Конго демократик республикаси Халқаро валюта фонди маълумотларига кўра дунёнинг энг қашшоқ мамлакатларидан бири ҳисобланади. Конго аҳолиси кун кечириш мақсадида жунгли ўрмонларида ёввойи ҳайвонларни овлашга мажбур бўлади. Давлат хизматчилари, талабалар ва қишлоқлар аҳолиси ов маҳсули бўлган ўлжаларини маҳаллий бозорлардаги «олиб-сотарлар»га пуллайди. Гўшт тимсоҳ ёки эчкемардан барбекю тайёрлашни ҳуш кўрадиган шаҳардаги бойваччаларга сотилади. Янги бойларни улар тановул қилаётган ҳайвонларнинг «Қизил китоб»га киритилгани ва халқаро миқёсда ҳимоя қилиниши асло ташвишга солмайди. Фотограф Томас Николон Мбандака шаҳридаги бозорда бўлган ва Reuters учун овчилар ҳаётидан фоторепортаж тайёрлаган.
Матонгу ва унинг дўстлари тунги овдан қуруқ қўл билан уйга қайтмоқда
Муҳаммад Эсимбо Матонгу ойда бир марта овга чиқади. Эркак давлат корхонасида ишлашига қарамай, у олаётган маош оиласини боқиш учун камлик қилади. У қўшимча даромад топиш учун овчилик қилади.
Овчилар ўлдирилган қизил думли маймунчани чумолилар еб кетмаслиги учун осиб қўйган
Табиат қўриқчилари Матонгу каби овчилар ҳайвонларга қирон келтирган ҳолда Марказий Африка ўрмонларида яшайдиган жониворларнинг тез қирилиб кетишида айбдор бўлаётганини айтиб жамоатчилик эътиборини тортишга уринмоқда.
Бонобо маймуни гўшти бозорда сотилмоқда
1990 йилларга қадар Матонгуга ўхшаш овчилар фақат озиқланиш мақсадида ҳайвон овлаган. Аммо катта шаҳарлардаги одамлар тансиқ таомларни еб кўргач, ёввойи ҳайвонлар гўштига бўлган талаб кескин кўтарилди, таклиф ҳам ўсди — овчилик ҳам оммавий касбга айланди.
Ов ўлжалари ортилган қайиқлар бозор ҳудудига кириб келмоқда
Матонгу ва юзлаб бошқа овчиларнинг ўлжалари Мбандакидаги бозорларнинг бирига олиб келинади. Бу ерда ҳар ҳафтанинг жумасида минглаб одамлар кемаларда олиб келинган тансиқ гўштларни томоша қилиш ва сотиб олиш учун йиғилади.
Матонгу уйга қайтишда маймун танасининг ярмини эшкакчиларга сотиб олишни таклиф қилмоқда
«Ўсмирлик вақтимда ўлжа топиш учун дарёдан ўнлаб километр юқорига кўтарилишимга тўғри келган. Ҳозир ёввойи ҳайвонлар камида 40 километр узоқликда яшириниб юради», — дейди 61 ёшли конголик овчи.
Тимсоҳлар ва эчкемарларнинг гўшти бозор расталарида
Мбандаки савдо расталари атрофини ёввойи ҳайвонлар гўштининг ҳиди тутиб кетади. Бу ерда тимсоҳ, эчкемар, маймун гўштлари ва ўрмон антилопаларининг оёқларини харид қилиш мумкин.
Ресторанга келган хўранда питон гўштидан тайёрланган таомни тановул қилмоқда
Камёб ҳайвонларнинг гўшти одатда ҳамма кўриши мумкин бўлган жойда сотилмайди. Бироқ сотувчидан бонобо маймунининг нимталанган гўшти борми деб сўралиши билан у раста остидан челакда ушбу маҳсулотни чиқариб намойиш қилишни бошлайди.
Бозордан тимсоҳ сотиб олган эркак унинг бошини олиб, барбекюда жизғанак қилишга тайёрламоқда
Конго ўрмонларида яшайдиган ёввойи ҳайвонларнинг кўп турлари, масалан, бонобо ёки панголини маймунлари халқаро жамоатчилик вакиллари томонидан қўриқланади. Аммо мамлакат ҳукумати ушбу камёб турларнинг ҳимоясига жиддий эътибор қаратмайди. Оқибатда овчилар уларни ўлдириб, гўштини пуллашда давом этаверади.
Ўлжалар сотиладиган бозор яқинига ўрнатилган Бутунжаҳон ёввойи табиатни асраш фонди плакати
Расмий маълумотларга кўра, овчилар ҳар йили Конго дарёси бўйидаги сув ҳавзалари атрофида олти миллион тонна ёввойи ҳайвонлар гўштини қўлга киритади. Ушбу улкан ўрмонлар қитъадаги олти мамлакат ҳудудини эгаллаган. Улар катталиги борасида фақат Бразилиядаги Амазонка ўрмонларидан ортда қолади.
Овчи Селестин, унинг рафиқаси ва қизи
Мбандакеда ҳайвонларни чин дилдан яхши кўрадиган меҳрибон инсонлар ҳам гоҳида қўлига қурол олиб, ов қилишига тўғри келади. Селестин эколог-талаба ва у ҳам оиласини боқиш учун ўлжа излашга мажбур.
«Айрим ҳайвонларни ов қилиш тақиқланган. Буни жуда яхши тушунаман, лекин менга университетдаги ўқишимни давом эттириш ва оиламга ёрдам беришим учун пул зарур», — дейди у. Селестин фотографдан тўлиқ исмини ошкор этмасликни илтимос қилган.
Матонгунинг хотини ўлдирилган маймун гўштидан таом тайёрламоқда
Ўрмонда ўтган бир неча кунлик овдан кейин Матонгу қўлида ўлжа кўтариб қишлоққа қайтди. У бозорга боришдан аввал оиласига ўлжадан муайян қисмдаги гўшт қолдиради. Бир уринишнинг ўзида 5 дан 100 минг конго франкигача (ўртача 30 минг сўмдан 580 минг сўмгача) даромад кўриш мумкин.
Матонгунинг оиласи ота овлаб келган маймун гўштидан тайёрланган таомни тановул қилмоқда
Матонгу ишхонасида 125 минг конго франки миқдорида ойлик олади (қарийб 740 минг сўм). Ушбу пуллар Матонгунинг хотини, тўртта боласи, иккита укаси ва жиянидан иборат катта оилани боқиш учун камлик қилади.
«Ҳўш уларни яна қандай йўл билан боқишим мумкин? Гоҳида ой охирида маош олишим ҳам кечикиб кетади. Бу ер Конго, биз бу ерда яшаб қолиш учун ҳар қандай йўлни танлашга мажбур бўламиз», — дейди овчи.
Паскал исмли овчи маймунни нишонга олмоқда
«Тадқиқотларимиз натижаси қишлоқ атрофида яшовчи ёввойи ҳайвонларнинг деярли қирилиб кетганлигини кўрсатди», — дейди Бутунжаҳон ёввойи табиатни асраш фонди вакили Микель Баканза.
Миллий парк рейнжерлари браконьерни қўлга олмоқда
Миллий паркларда ов қилиш қонун билан тақиқлаб қўйилган, бироқ конголиклар мўмай пул топиш илинжида қўриқланадиган ҳудудда ёввойи ҳайвонлар жунгли ўрмонларидагига нисбатан кўпроқ экани ва ов қилиш осонроқлиги учун тез-тез бундай жиноятларни содир қилиб туради.
Бозорда сотилаётган қизил думли маймун боласи
Овчилар одатда дарё бўйида тунда ёки кундуз куни кичик лагер қуради ва чакалакзорлардаги овдан кейин у ерга қайтади. Қуруқ қўл билан ортга қайтиб бўлмайди, сабаби барча овчилар оила боқиш илинжида сайёдлик йўлини танлаган. Улар қийинчилик билан қўлга киритган гўшт якунда бойлар томонидан истеъмол қилинади.
Матонгу уйи ёнида хотини билан
Матонгу овга кетаётган вақтида ижарага қайиқ олиб, иккита эшкак, қўлбола милтиқ, бир нечта патрон ўқлар ва маниок ўсимлигидан тайёрланган нон захирасини олади.
Мактаб ўқувчиси браконьерлардан қутқарилган бонобо маймуни боласини кузатиб турибди. Лола я Бонобо қўриқхонаси
Давлат йўқолиб бораётган ёввойи ҳайвонларни сақлаб қолишга жиддий киришди, лекин амалдорлар ҳам халқнинг камёб гўштга қизиқиши тўкис ҳаёт кечириш оқибатида бўлмаётганини яхши тушунади.
Паскал ўлдирилган қизил думли маймунча ва унинг боласи билан тунда лагерга қайтмоқда
Қашшоқ овчилар ҳар қандай ўлжа билан уйга қайтади, маймун, ўрмон антилопаси, тимсоҳ, бўғма илон ёки дарё тўнғизи. Энг муҳими бозорда ушбу маҳсулотни пуллаш имкониятининг бўлиши.
Изоҳ (0)