Россия пойтахти Москва шаҳри марказидаги Федерал хавфсизлик хизмати биноси олдида номаълум шахс автоматда ўт очди. Юзага келган отишма оқибатида жабрланганлар ва ҳалок бўлганлар мавжуд. Федерал хавфсизлик хизмати ҳужум қилган шахсларнинг йўқ қилинганини маълум қилди, деб ёзмоқда TJournal.
Хабар берилишича, отишма бинонинг қабулхонасида юз берган. Ҳужум қилганларнинг сони ҳақида турли маълумотлар берилмоқда. RT ва «Росбалт»нинг ФХХдаги манбаларига таяниб хабар беришича, уч киши қабулхонага кирган ва отишма бошлаган. Уларнинг икки нафари қўриқчилар билан отишма вақтида йўқ қилинган. Шундан сўнг ҳужум қилган учинчи шахс кўчага қочган, ФХХ жойлашган кўчадаги биноларнинг бирига жойлашиб, отишмани давом эттирган. Штурм вақтида мазкур шахс ҳам йўқ қилинган.
Россия Федерал хавфсизлик хизмати Жамоатчилик алоқалари маркази ҳужум қилганлар уч киши бўлганини тасдиқлади. Улар ФХХнинг қабулхонаси биносига кирган ва отишма бошлаган. Қўриқлаш хизмати билан бўлган отишмада уларнинг икки нафари ўлдирилган. Учинчи шахс эса кўчага қочиб чиққан ва отишмани давом эттирган. Натижада қабулхона биноси қаршисида навбатчилик қилаётган йўл ҳаракати хавфизлиги инспектори ўлдирилган.
ФХХ томонидан маълум қилинишича, махсус хизматлар мазкур ҳодисани теракт деб баҳоламоқда.
Жабрланганлар ҳақидаги маълумотлар ҳам турлича, Россия Соғлиқни сақлаш вазирлиги отишмада ФХХнинг икки нафар ходими оғир тан жароҳати олганини маълум қилган. Шунингдек, жароҳатланганлар сони икки киши эканлиги ҳақида ҳам хабар берилган. Бошқа манбаларга кўра, уч киши жароҳат олган, улардан бири вафот этган.
Россия Тергов қўмитаси ҳолат юзасидан жиноят иши қўзғатди.
Изоҳ (0)