Ўзбекистон Бош прокуратураси интернет нашрлари ва ижтимоий тармоқларда 14 декабрь куни Фарғона вилояти ҳокими Шуҳрат Ғаниевга мансублиги таъкидланиб тарқатилган аудиоёзув юзасидан баёнот берди.
Фото: Мадина Нурман / «Дарё»
Идора баёнотига кўра, ҳозирда прокуратура органлари ушбу аудиоёзувнинг ҳаққонийлиги, ундаги воқеа қачон, қаерда ва қандай ҳолатларда юз берганлиги ҳамда бошқа ҳолатларни ўрганмоқда.
«Ўрганиш натижалари ҳар томонлама қонун доирасида кўриб чиқилиб, улар юзасидан қўшимча баёнот берилади», — дейилади Бош прокуратура баёнотида.
14 декабрь куни интернетда Фарғона вилояти ҳокими Шуҳрат Ғаниевнинг овози деб тахмин қилинган аудио тарқалган эди. Унда вилоят ҳокими деб тахмин қилинаётган шахс 2 декабрда ўтказилган йиғилишда Қувада газ йўқлиги учун йўлни тўсиб чиққанлар воқеасини ижтимоий тармоқларда тарқатган шахс (блогер)нинг «жанозаси ўқилмагани» учун Қува ҳокимини тергаган.
Кейинроқ Фарғона вилояти ҳокимлиги матбуот хизмати аудиодаги овоз Шуҳрат Ғаниевники эмаслиги ҳақида баёнот берди.
Мавзуга доир: Кушербаев прокуратурадан Шуҳрат Ғаниев билан боғлиқ воқеага ҳуқуқий баҳо беришни сўради
Қайд этиш жоиз, 2019 йил сентябрида Фарғона вилояти ҳокими Шуҳрат Ғаниевнинг бошқа бир аудиоси тарқалиб кетган, шундан сўнг у Сенатда узр сўраган эди. Ўшанда унга қаттиқ огоҳлантириш ва уч ой синов муддати берилган эди.
