Ниғматилла Йўлдошев Бош прокуратуранинг собиқ раҳбарлари ҳақида фикр билдирди

18 декабрь куни ЎзЭОАВМАда ҳуқуқ-тартибот органлари раҳбарлари иштирокида матбуот анжумани бўлиб ўтди, деб хабар берди «Kun.uz».

Тадбирда иштирок этган Ўзбекистон Бош прокурори Ниғматилла Йўлдошев прокуратуранинг собиқ раҳбарлари ҳақида фикр билдирди.

«Назорат органининг собиқ раҳбарияти фаолиятига танқидий баҳо бериш жуда қийин. Бош прокуратура раҳбарияти томонидан қонунларнинг бузилиши прокуратура органларида хизмат қилаётган виждонли ходимларнинг руҳий ҳолатига салбий таъсир кўрсатди. Бу, шунингдек, бизга нисбатан халқнинг салбий муносабати шаклланишига ҳам туртки бўлди. Биз халқ прокуратурасини яратишимиз керак», — деди Ниғматилла Йўлдошев.

Эслатиб ўтамиз, Жиноят ишлари бўйича Тошкент шаҳар суди Юнусобод туман судининг биносида 2019 йил 26 июнь куни Ўзбекистоннинг собиқ бош прокурори Рашиджон Қодиров ва бошқаларга оид (жами 13 нафар шахс) жиноят иши бўйича айблов ҳукми эълон қилинди.

Суднинг ҳукми билан айбли деб топилган жиноятлари учун Рашиджон Қодировга ЖК 50-моддасининг 6-қисми тартибида 10 йил озодликдан маҳрум қилиш ва энг кам ойлик иш ҳақининг 500 баравари миқдорида жарима жазоси тайинланди. Шунингдек, У. Суннатов 19 йилга, А. Мирзаев 15 йилга, У. Хуррамов 14 йилга, Ж. Файзиев 13 йилга, Л. Мусашайхов 13 йилга озодликдан маҳрум қилинди.

Ўзбекистон Ҳарбий суди томонидан 27 сентябрь куни Давлат хавфсизлиги хизмати (ДХХ)нинг собиқ раиси Ихтиёр Абдуллаев ва у томонидан ташкил этилган жиноий уюшма аъзоларига нисбатан айблов ҳукми эълон қилинди.

Ихтиёр Абдуллаев жиноий уюшма ташкил этиб, мансаб ваколатини суиистеъмол қилиб, уюшган гуруҳ ва жиноий уюшма манфаатларини кўзлаб, жуда кўп миқдорда пора олиш, Ўзбекистон манфаатларига хилоф равишда битимлар тузиш, товламчилик, ўзлаштириш йўли билан талон-торож қилиш, божхона тўғрисидаги қонун ҳужжатларини бузиш ва шу каби бир қатор жиноятларни содир этганликда айбли деб топилиб, жиноятлар мажмуи тариқасида 18 йил муддатга озодликдан маҳрум қилиш жазосига ҳукм қилинган.

2018 йил январидан 2019 йил ёзига қадар Ўзбекистон бош прокурори лавозимида ишлаган Отабек Муродов 2019 йилнинг 18 сентябрида қамоққа олинди. Президент Шавкат Мирзиёев Сенатдаги чиқишида собиқ бош прокурорни танқид қилиб, у порахўрликда айбланаётгани ва унга нисбатан жиноий иш очилганини айтганди.

Кейинроқ Бош прокуратура матбуот хизмати Отабек Муродов ўзидан аввалги Ўзбекистон бош прокурори ДХХ собиқ раҳбари Ихтиёр Абдуллаев иши доирасида тергов қилинаётгани ҳақида маълумот берган эди.