Испания чемпионатининг 10-тур қолдирилган учрашуви доирасида «Барселона» жамоаси ўз майдонида «Реал Мадрид»ни қабул қилади. Ўйин 18 декабрдан 19 декабрга ўтар кечаси 00:00да бошланади.
«Дарё» ушбу учрашувга оид қизиқарли факт ва статистикаларни тақдим этади.
«Барселона» ва «Реал» барча мусобақалар доирасида жами 242 марта тўқнаш келган. Уларнинг 96 тасида каталонияликларнинг қўли баланд келган бўлса, «Реал» 95 марта ютуққа эришган. Яна 51 ўйинда дуранг қайд этилган. 2019 йилнинг март ойида «Барселона» 88 йил деганда илк бор ўзаро ўйинлардаги ғалабалар сони бўйича «Реал»ни ортда қолдирганди.
Ушбу жамоалар ўртасидаги илк ўйин 1902 йилнинг 13 май куни бўлиб ўтган. Унда каталонлар 3:1 ҳисобида зафар қучган. Испания чемпионати доирасидаги биринчи ўйин эса 1929 йил, лига ташкил этилган пайтда бўлиб ўтган ва унда мадридилкар 2:1 ҳисобида ғалаба эришган. Маълумот учун, «Барселона» ва «Реал» шунингдек, Бильбаонинг «Атлетик» клуби Испания олий дивизионида мунтазам иштирок этиб келаётган жамоалар ҳисобланади.
Мавзуга доир: «Барселона» яна «Реал»га қарши. «Эль-Класико» борасидаги билимларингизни синаб кўринг!
Класико тарихидаги энг узун мағлубиятсиз серия «Барселона»га тегишли. 1917 йилнинг ноябридан 1928 йилнинг июнига қадар каталонлар кетма-кет 13 та ўйинда «Реал»га ютқазмаган. «Қаймоқранглилар»нинг эса бу борадаги энг яхши кўрсаткичи 10 та ўйинга тенг (1931 йил январидан 1935 йилнинг февралига қадар).
«Реал» 1984—2003 йиллар мобайнида «Камп Ноу»да бирорта ғалабага эриша олмаган. «Реал» ўзининг энг яхши ҳолатида бўладими ёки «Барселона» энг ёмон формадами, фарқи йўқ. 19 йил мобайнида Барселонада қўлга киритилган бир очко «Реал» учун яхши натижа ҳисобланган. Бу серияга 2003 йилнинг 7 декабрида «Галактикос» томонидан нуқта йўқилганди. Ўшанда Роберто Карлос ва Роналдонинг голлига Патрик Клюйверт ягона киритилагн тўп билан жавоб қайтарганди.
1948 йилнинг январидан 1954 йилнинг ноябрига қадар «Эль-Класико» ўйинларида муроса йўли танланмаган. Жамоалар кетма-кет 18 та учрашувда ғолиб номини аниқ қилган ва бу рекорд ҳисобланади.
Лео Месси фаолияти мобайнида 41 марта «Реал»га қарши ўйин ўтказган. Аргентиналик футболчи бу ўйинларда 26 гол ва 14 та масарали узатма амалга оширган. Месси класико тарихидаги энг яхши тўпурар ҳисобланади.
«Барселона» барча мусобақаларни инобатга олганда «Реал»га қарши кечган сўнгги олтита учрашувда мағлубиятга учрамади.
«Барселона» Ла Лига доирасидаги сўнгги тўртта уй ўйинида камида тўрттадан гол урмоқда —«Мальорка» (5:2), «Сельта» (4:1), «Вальядолид» (5:1), «Севилья» (4:0). Бундан ташқари ушбу мавсумдаги еттита уй ўйинидан фақат биттасида йирик ҳисоб қайд этилмаган.
«Реал» Примерада сўнгги еттита ўйиндан буён мағлубиятсиз серия қайд этмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)