Шаҳар ва туманларда ноқонуний равишда йўловчи ташиш фаолияти билан шуғулланаётган ва ҳайдовчилар томонидан йўлкира нархларини сунъий равишда оширишнинг олдини олиш мақсадида Андижон вилоятида махсус рейд тадбирлари ўтказилмоқда. Бу ҳақда Транспорт вазирлиги ахборот хизмати хабар берди.
Вилоят прокуратураси, вилоят монополия бошқармаси, йўл ҳаракати хавфсизлиги бошқармаси, давлат солиқ бошқармаси ҳамда вилоят транспорт бошқармаси ходимларидан иборат таркибда 8 та рейд гуруҳлари шакллантирилиб, Андижон вилоятининг муайян ҳудудларига бириктирилди.
Қўшма рейд тадбирлари давомида лицензиясиз йўловчи ташиш фаолияти билан шуғулланаётган, автотранспорт воситасини техник кўрикдан, ҳайдовчилари эса тиббий кўрикдан ўтмаган ҳолда йўналишларга чиқиб фаолият юритаётган, шунингдек, йўлкира нархларини асоссиз равишда ошириб олган ҳайдовчиларга нисбатан тегишли тартибда чоралар кўрилмоқда.
Аввалроқ ижтимоий тармоқларда Андижон давлат университети талабалари шаҳардаги 222-йўналиш «Пистамозор – Марказий шаҳар шифохонаси» ва 75-йўналиш «Андижон давлат университети – Янгибозор» ҳайдовчилари томонидан йўлкира нархи ассосиз равишда ошириб олингани борасида хабарлар тарқалган эди.
12 декабрь куни Андижон шаҳрида ўтказилган қўшма рейд тадбирида жами 21 нафар лицензиясиз ноқонуний фаолият кўрсатаётган ҳайдовчилар аниқланиб, маъмурий баённомалар расмийлаштирилди.
Шунингдек, 5 нафар ҳайдовчилар техник ва тиббий кўриклардан ўтмаганлиги, 36 нафари белгига амал қилмаганлиги, 31 нафари йўловчи ташиш қоидасини бузганлиги ва 9 нафари йўл кира нархларини ўзбошимчалик билан ошириб олганлиги учун жами 102 та маъмурий баённомалар тузилди.
Изоҳ (0)