Ҳақиқат қарор топди: «Дарё» танқидидан сўнг сурхондарёлик номзод ўз жойига қайтарилди

«Дарё» интернет нашрида Сурхондарё вилоятининг Қизириқ туманидаги 30-мактаб директори Дилбар Саидованинг дастлаб Ўзбекистон Либерал демократик партиясидан туман Кенгаши депутатлигига номзод сифатида кўрсатилгани, номзодларни рўйхатга олиш ишлари тугатилгач эса Халқ демократик партиясидан номзод сифатида чиқиб келгани ҳақида сўз юритгандик.

Сурхондарё вилоят ҳокимлиги ахборот хизмати раҳбари Заҳириддин Тўраевнинг «Дарё»га маълум қилишича, Қизириқ туман Сайлов комиссиясининг 2019 йил 12 декабрдаги қарорига асосан Дилбар Саидовага ЎзЛиДеП аъзолиги қайтарилиб, туман Кенгаши депутатлигига дастлабки мазил — «Янгикент» маҳалласидан номзод қилиб кўрсатилган.

Қизириқ туман ҳокимлиги ахборот хизмати раҳбари Анвар Бўриевнинг айтишича, туман мутасаддилари йўл қўйилган хато-камчиликни тушуниб етишган.

— Бундан кейин бу каби хато-камчилик такрорланмайди, — дейди туман ҳокимлиги ахборот хизмати раҳбари. — Биз хатойимизни англаб етдик.

Анвар Бўриевнинг қўшимча қилишича, «Дарё»да эълон қилинган шу ҳақдаги иккинчи мақолада қизириқлик Тўра Шойқулов исмли фуқаро бир вақтнинг ўзида туман Кенгаши ва вилоят Кенгаши депутатлигига 2 та партия — «Адолат» СДП ва ХДП дан номзод қилиб кўрсатилгани бу шошма-шошарлик белгиси.

— Ҳақиқатан ҳам партияларнинг пала-партиш иши ва тала-тўп сабаб газетада чоп этилган депутатликка номзодлар рўйхатида Тўра Шойқулов исм-шарифли номзод 28-Бандихон сайлов округидан Халқ депутатлари туман Кенгаши депутатлигига Халқ демократик партиясидан, вилоят Кенгашига эса «Адолат» СДП дан даъвогар сифатида хато кўрсатилган, —  дейилади ҳокимлик ахборот хизмати муносабатида. — Шунга кўра, Қизириқ туман сайлов комиссияси фуқаро Тўра Шойқуловнинг номзодликдан воз кечиш ҳақидаги аризасига мувофиқ, 2019 йилнинг 15 ноябрдаги Халқ депутатлари туман Кенгаши депутатлигига номзодликка рўйхатга олиш тўғрисидаги 15-сонли қарорининг унга тегишли қисми белгиланган тартибда бекор қилинган.