Olmaliq shahridagi bir qator mustaqil blogerlar tomonidan yo‘lkira narxi oshirilishi yuzasidan tanqidiy material e’lon qilindi. Unda viloyat hokimining 729-sonli qarori talablari to‘la bajarilmagani, xususan, hokimlik veb saytida, mahalliy nashrlarda qaror matni chop etilmagani haqida so‘z boradi. Bu haqda Toshkent viloyati hokimligi axborot xizmati xabar bermoqda.
Mazkur vaziyat zudlik bilan viloyat hokimining matbuot kotibi, viloyat hokimligi ijro apparati bosh mutaxassisi, mutaxassislari va mazkur qaror loyihasini tayyorlagan kotibiyat ishtirokida muhokama qilindi.
Ma’lum bo‘lishicha, qaror nusxasini o‘rnatilgan tartibda tarqatish ro‘yxatiga viloyat hokimligi axborot xizmati texnik xato tufayli kiritilmay qolgan. Kelgusida bunday holat qaytarilmasligi yuzasidan tegishli mas’ullar qat’iy ogohlantirildi.
Ta’kidlanishicha, mazkur qaror loyihasi, amaldagi qonunchilikka muvofiq, hukumat portaliga 30-avgust kuni muhokama uchun joylashtirilgan. Loyiha joylashtirilgan paytdan boshlab fuqarolar qarorning muhokamasi jarayonida o‘z fikr-mulohazalarini bildirishi mumkin edi.
Qaror bugun, ayni daqiqalarda viloyat hokimligining rasmiy veb saytiga joylashtirilmoqda.
“Qarorning yangi tariflarni joriy etilishi va transport tashish bilan shug‘ullanuvchi korxonalarning ushbu narxda xizmat ko‘rsatishiga doir qismi ijrosini ta’minlash viloyat transport boshqarmasi hamda shahar, tuman hokimliklari zimmasiga yuklatilgan. Shu bois, Olmaliq shahrida yo‘lovchilarga transport xizmati ko‘rsatish narxining aynan 15-oktabr kunidan boshlab oshirilgani shahar hokimligining ichki ishi, deb hisoblaymiz.
Mustaqil blogerlarga mazkur holatda faol fuqarolik pozitsiyasini namoyon etgani, voqelikka asosli munosabat bildirgani uchun minnatdorlik bildiramiz”, — deyiladi xabarda.
Izoh (0)