Қозоғистонлик тадбиркор Арманжан Байтасов Forbes Uzbekistan журнали фаолиятини йўлга қўймоқчи, деб хабар беради Spot.
Бизнинг компаниямиз Forbes журналини Ўзбекистонда нашр этиш ҳуқуқини олганини мамнуният билан маълум қилмоқчиман. Янги лойиҳани яратиш ҳар доим мени янги ютуқларга илҳомлантиради. Бундай бренд остида кейинги лойиҳани ишга тушириш икки карра ёқимли. Бу ҳаётий энергия беради ва қўшимча ижобий муносабат яратади», — дейди тадбиркор.
Тадбиркорга кўра, Forbes нашрининг Ўзбекистонда очилиши жуда долзарб, чунки республика бизнес юритиш нуқтаи назаридан жуда истиқболли.
«Ўзбекистон дунёдаги энг жадал ривожланаётган давлатлардан бири бўлиб, йирик инвесторлар учун жуда қулай шарт-шароитга эга. Қўшни мамлакат иқтисодиётида рўй бераётган ўзгаришлар, Ўзбекистон ҳукуматининг инвесторларга яратаётган шарт-шароитлари катта қизиқиш уйғотмоқда. Қозоғистон ва Ўзбекистон жуда яқин мамлакатлардир. Биз узоқ вақт давомида бир давлат — СССР доирасида мавжуд эдик. Ва менталитет жиҳатдан биз бир-биримизни жуда яхши тушунамиз. Ижодий ва бизнес элита ҳатто иттифоқнинг парчаланишидан кейин ҳам яқин алоқада бўлиб, бир-бири билан алоқаларни сақлаб қолди. Буларнинг барчаси бизга Ўзбекистонда медиа-лойиҳани қисқа муддатда ривожлантириш ва муваффақиятга эришишимиз мумкинлиги ҳақида тассурот уйғотади», - дея қўшимча қилди тадбиркор.
Унинг фикрича, аҳолиси 33 миллион кишидан ошадиган Ўзбекистон йирик муштарийлар аудиториясига эга. Шунинг учун, ҳеч бўлмаганда, ушбу республика фуқароларининг бир қисмида сифатли таҳлил ва бизнес журналистикасига талаб бор.
«Биз бундай материалларни тайёрлаш, ушбу аудиторияга керак бўладиган контентни яратиш борасида катта тажрибага эгамиз», деди Арманжан Байтасов.
Янги журнал таҳририяти биноси Тошкент шаҳрида бўлади. Муштарийларга нашрнинг босма ва сайт кўринишларидаги версияси тақдим этилади. Журнал ҳозирча фақат рус тилида, сайт эса рус ва ўзбек тилларида бўлади.
Декабрь ойидан журнал таҳририятига келган резюмелар кўриб чиқила бошлайди, кейин эса журналистлар билан суҳбат жараёни бошланади. Forbes Uzbekistan’нинг илк сони 2020 йилнинг март ойида чоп этилиши режалаштирилган.
Ўзбекистонда ОАВ устав фондиннинг фақат 30 фоизигина хорижий ҳамкорга тегишли бўлиши мумкин. Байтасов бу масалани қандай ҳал қилиши ҳозирча номаълум, дейилади хабарда.
Изоҳ (0)