Ўзбекистонда ҳеч бир тергов органида, хусусан, прокуратурада ҳам бирор фуқарони 48 соатдан ортиқ ушлаб туриш ваколати бўлмаслиги лозим. Бу ҳақда «Адолат» социал-демократик партияси раҳбари Наримон Умаров «Gazeta.uz»га берган интервьюсида айтиб ўтди.
Мухбирнинг: «Абдуллоҳ Тоҳировнинг оиласи унинг йўқолиб қолгани ҳақида эълон қилганидан сўнг, фақат сизнинг партиянгиз бу оилани қўллаб-қувватлади ва Бош прокуратура, ИИВдан қўлга олиш сабабларини очиқлашни сўради. Ишнинг якунидан қониқиш ҳосил қилдингизми? Улардан жавоб ололдингизми?», деган саволига, Наримон Умаров шундай жавоб берган:
Биз уларга вазиятни ойдинлаштириб бериб, йигитни қўйиб юборишлари учун мурожаат қилдик. Ҳозирча ижтимоий тармоқлар орқали ҳам, расман ҳам жавоб олганимиз йўқ. Бундай ҳолатлар ортиқ такрорланмаслиги лозим. Бу мазкур органларнинг ўзбошимчалиги. Бундай ҳолатлар йиллар давомида тўпланиб келмоқда. Бундай ҳолатлар жуда кўп.Эслатиб ўтамиз, андижонлик Абдуллоҳ Тоҳиров 26 октябрь куни, тахминларга кўра, Анлижон вилояти ИИБ Терроризм ва экстремизмга қарши курашиш бошқармаси бошлиғининг машинаси билан тўқнашув содир этганидан сўнг, бедарак йўқолган эди. Унинг йўқолгани ҳақида дастлаб, 2 ноябрда ижтимоий тармоқларда, 4 ноябрдан бошлаб интернет-нашрларда хабарлар тарқатилган эди.Шу боис ҳам биз тергов органлари, прокурор фуқарони бирор нимада айблаб, 48 соатдан ортиқ ушлаб туриш ҳуқуқига эга бўлмаслиги керак, деяпмиз. Прокурордан мустақил тергов қўмитаси бўлиши керак.
У йигит нима учун 15 кунга қамалганини мен тушунганим йўқ. Бунинг сабабларини бутун халқимиз ҳам билмайди. Агар у нимададир айбдор бўлса, унга нисбатан қонунчиликка мувофиқ айблов эълон қилиниши лозим.
Ушбу ўзбошимчалик бу органлар ўзини ҳақ деб ҳисоблагани учун юз берди. Лекин улар ҳеч қаерда ҳеч нарсани изоҳлаб беришгани йўқ. Биз бундай ҳолатлар батамом йўқ бўлишини хоҳлаймиз. Прокуратура аввало қонунийликни таъминлаши керак, жазоловчи органга айланиб қолмаслиги лозим. Улар халққа қарши эмас, халқ учун ишлашлари керак. Ваҳоланки, ўзи қонунни бузиб турибди. Прокуратура ҳатто сиёсий партияларга жавоб беришни ҳам ўзига эп кўрмаяпти.
Наримон Умаров, «Адолат» социал-демократик партияси
7 ноябрь куни ИИВ «Абдуллоҳ Тоҳиров иши билан бошқа идора шуғулланаётгани» ҳақида баёнот берди, эртасига Ёшлар Иттифоқи ҳам ИИВнинг ушбу хабарини тасдиқлади. «Адолат» социал-демократик партияси эса ушбу ҳолатда ўзбошимчаликка йўл қўйган орган ходимларига нисбатан чора кўриш, шунингдек, йигитнинг икки ҳафта давомида қаерда ушлаб турилгани ҳақида мутасаддиларнинг хатти-ҳаракатларига ҳуқуқий баҳо беришни талаб қилиб чиқди.
9 ноябрга ўтар кечаси Абдуллоҳ Тоҳиров уйига қайтгани маълум бўлди, лекин у ўтган кунлар давомида айнан қаерда ва нима учун сақлаб турилгани ҳақида ахборот берилмади.
Изоҳ (0)