Олий Мажлис Сенати аъзолари 24-ялпи мажлисда Ўзбекистон Олий суди таркибига ўзгартиришлар киритиш тўғрисидаги масалани ҳам кўриб чиқди. Бу ҳақда «Дарё» мухбири хабар берди.
Конституциянинг 80-моддаси 3-бандига ва «Ўзбекистон Республикаси Олий Мажлисининг Сенати тўғрисида»ги Ўзбекистон Республикаси Конституциявий қонуни 9-моддаси биринчи қисмининг 3-бандига мувофиқ Ўзбекистон Республикаси Олий Мажлисининг Сенати қарори билан Шуҳрат Аббосов 10 йил муддатга, Раҳматилла Орзиқулов 10 йил муддатга Ўзбекистон Олий судининг судьяси лавозимига сайланди.
Муқаддас Ғуломова ва Ҳамро Бердиқиличев бошқа ишга ўтаётгани муносабати билан Ўзбекистон Олий судининг судьяси лавозимидан озод этилган.
Шуҳрат Аббосов 1979 йилда Бухоро шаҳрида туғилган. 2000 йили Бухоро давлат университети тарих факультетини, 2004 йилда Самарқанд давлат университетининг юридик факультетини тамомлаган. 2005—2008 йилларда фуқаролик ишлари бўйича (ФИБ) Бухоро вилоят суди мажлис котиби, суд мутахассиси, бош мутахассис, 2008—2011 йилларда ФИБ Ромитан туманлараро судининг раиси, 2011—2014 йилларда ФИБ Ғиждувон туманлараро судининг раиси, 2014—2017 йилларда ФИБ Навоий вилоят суди раисининг ўринбосари, 2017 йилдан шу кунга қадар Ўзбекистон Судьялар олий кенгашининг доимий асосдаги аъзоси, Судьялар олий кенгашининг судьяси лавозимида ишлаб келган.
Раҳматилла Орзиқулов 1982 йилда Жиззах вилоятида туғилган. 2000 йили Тошкент давлат юридик институтини тамомлаган. Меҳнат фаолиятини Жиззах вилояти Шароф Рашидов тумани Мирзо Улуғбек хўжалигининг ҳуқуқий маслаҳатчиси вазифасида бошлаган. 2002—2008 йилларда жиноят ишлари бўйича (ЖИБ) Жиззах вилоят судининг суд мажлис котиби, архив мудири, катта мутахассис, бош мутахассис вазифаларида ишлаган. 2008—2011 йилларда ЖИБ Пахтакор тумани судининг раиси, 2011—2016 йилларда ЖИБ Жиззах вилоят судининг судьяси, 2017 йилда Бош прокуратура ҳузуридаги Мажбурий ижро бюроси Жиззах вилояти бошқармасининг суриштирувчиси, 2017—2018 йилларда «Ўзсаноатқурилишбанк»нинг Жиззах вилоят филиали ҳуқуқий маслаҳатчиси бўлиб ишлаган. 2018 йилда ЖИБ Жиззах шаҳар суди раиси лавозимига тайинланган.
Изоҳ (0)