Самарқанд шаҳрининг Рудакий ва Бўстонсарой кўчалари чорраҳасида коммуникация қувури ўтказиш ишлари олиб борилаётган вақтда 30 ноябрь куни соат 17:30 атрофида тупроқ массаси кўчиб тушиши натижасида икки киши тупроқ остида қолган. Бу ҳақда шаҳар ҳокимлиги матбуот хизмати хабар бермоқда.
Самарқанд вилоят Фавқулодда вазиятлар бошқармаси берган маълумотга кўра, «Стапласт» компанияси ишчиси, 1997 йилда туғилган М.Т. жиддий тан жароҳати олган ва тез тиббий ёрдам хизмати орқали Республика шошилинч тиббий ёрдам илмий маркази филиалига олиб кетилган. 1981 йилда туғилган У.Р. воқеа жойида вафот этган.
Самарқанд шаҳрида ишчиларни тупроқ босиб олиши билан боғлиқ ҳодиса сўнгги бир ой ичида иккинчи марта кузатилмоқда — аввалроқ, 13 ноябрь кундузи Ҳишрав кўчасида сувоқова қувурларини таъмирлаш ишларига жалб этилган икки ишчини тупроқ босиб қолиб, уларнинг иккиси ҳам воқеа жойида ҳалок бўлган эди.
Изоҳ (0)