Ўзбекистон Олий Мажлис Сенатининг 24-ялпи мажлиси 30 ноябрь, шанба куни Тошкент шаҳрида бўлиб ўтади. Бу ҳақдаги қарор Сенат Кенгашининг мажлисида қабул қилинди.
Дастлаб ялпи мажлисда илк бор қабул қилинган «2020 йил учун Ўзбекистон Республикасининг Давлат бюджети тўғрисида»ги қонун муҳокама қилинади.
Шунингдек, ялпи мажлисда «Ўзбекистон Республикаси Вазирлар Маҳкамаси тўғрисида»ги қонуннинг янги таҳрири, «Волонтёрлик фаолияти тўғрисида»ги, «Касаба уюшмалари тўғрисида»ги, «1993 йил 22 январдаги Фуқаролик, оилавий ва жиноят ишлари бўйича ҳуқуқий ёрдам ҳамда ҳуқуқий муносабатлар тўғрисидаги Конвенсияга доир Баённомани (Москва, 1997 йил 28 март) ратификация қилиш ҳақида»ги қонунлар кўриб чиқилади.
Мажлис кун тартибидан «Фаол инвестициялар ва ижтимоий ривожланиш йили» давлат дастурининг 2019 йил 3-чорагидаги ижроси юзасидан Вазирлар Маҳкамасининг ҳисоботи эшитуви ўрин олган. Шу билан бирга, сенаторлар тадбиркорлик субъектларини тугатиш тартиби такомиллаштирилиши, бола ҳуқуқларининг кафолатлари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритишга қаратилган қонунларни муҳокама қилади.
Самарқанд шаҳри ва Самарқанд тумани чегараларини ўзгартириш, Вазирлар Маҳкамасига божхона органлари томонидан қонун ҳужжатларининг ижро этилиши ҳолати, арзон уй-жой қурилиши, газ ва электр таъминоти билан боғлиқ парламент сўровларини юбориш тўғрисидаги масалалар ҳам мажлис кун тартибига киритилган.
Изоҳ (0)