Ўзбекистон МДҲга аъзо давлатлар божхона хизматлари раҳбарлари кенгашининг 70-йиғилишига мезбонлик қилмоқда. Бу ҳақда Божхона қўмитаси матбуот хизмати маълум қилди.
Кенгаш йиғилишида Armaniстон, Беларусь, Озарбайжон, Россия, Тожикистон, Қирғизистон, Қозоғистон ва Ўзбекистон божхона хизмати раҳбарлари ва делегациялари иштирок этмоқда.
Йиғилишнинг асосий тадбири 21 ноябрь, пайшанба куни Тошкентдаги «Ўзбекистон» анжуманлар саройида бўлиб ўтди.
Йиғилиш давомида божхона соҳасининг турли йўналишлари бўйича халқаро ҳамкорликни янада кучайтиришга қаратилган бир қатор ҳужжатлар имзоланди. Хусусан, транспорт ва тижорат ҳужжатларига тушириладиган божхона органларининг муҳр ва штампларини ўзаро тақдим этиш тартиби тўғрисидаги келишув, темир йўлда ташиладиган юкларнинг божхона операцияларини амалга оширишда божхона органлари ва темир йўлда ташувчилар ўртасида ўзаро ҳамкорликнинг технологик йўриқномаси имзоланди.
МДҲга аъзо давлатлар божхона хизматлари раҳбарлари кенгашининг 70-йиғилиши кўплаб икки томонлама учрашувлар учун ҳам ўзига хос мулоқот майдонига айланди.
Мазкур учрашувлар натижасида:
Ўзбекистон ва Тожикистон божхона хизматлари ўртасида божхона чегаралари орқали олиб ўтилаётган товар ва транспорт воситалари ҳақида олдиндан ахборот алмашинувини йўлга қўйишга доир баённома;
Ўзбекистон ва Озарбайжон божхона хизматлари ўртасида божхона чегаралари орқали ҳаракатланаётган товар ва транспорт воситалари ҳақида ўзаро ахборот алмашинувининг техник шартлари;
Ўзбекистон ва Россия божхона хизматлари ўртасида божхона чегаралари орқали ҳаракатланаётган товар ва транспорт воситалари ҳақида ўзаро ахборот алмашинуви бўйича келишувга киритиладиган қўшимча ва ўзгартиришлар;
Ўзбекистон Божхона қўмитасининг Божхона институти ва Россия божхона хизматининг Божхона академияси ўртасида 2020—2025 йилларда кадрлар тайёрлаш ва малакасини ошириш бўйича ҳамкорлик режаси имзоланди.
Йиғилиш давомида кенгаш ишида алоҳида фаоллик кўрсатиб келаётган ва божхона соҳасида халқаро ҳамкорликни ривожлантиришга қўшган ҳиссаси учун бир қатор маҳаллий ва хорижий делегациялар вакиллари кенгашнинг 70-юбилей йиғилиши муносабати билан таъсис этилган эсдалик кўкрак нишонлари билан тақдирланди.
Изоҳ (0)