Туркманистонда хорижга чиқиш борган сари қийинлашмоқда

Туркманистон миграция хизмати аэропортда хорижга кетмоқчи бўлган фуқароларни турли баҳоналар билан бесабаб ушлаб туришда давом этмоқда, деб ёзган «Хроника Туркменистана».

Нашрнинг маълум қилишича, 12 ноябрда етти нафар бўлган туркманистонликлар оиласи Ашхободдан Истанбулга тўйга учиб кетиши керак бўлган, аммо миграция хизмати ходимлари сафарнинг сабаби тўй эканини билгач, бўлажак келиннинг отаси ҳамда унинг икки нафар қариндошининг Туркияга кетишига тўсқинлик қилган.

Туркманободлик эркаклар ушбу тақиқ сабабини сўраган пайтда миграция ходими Миллий хавфсизлик вазирлиги нозирини чақирган. «Тўйчилар»ни алоҳида хонага олиб кириб, вазиятни тушунтириш ўрнига уларни бўралатиб сўкишган.

«Нима учун қизингиз туркга турмушга чиқмоқда? Унга туркманлар ёқмайдими?», – дея бақирган келиннинг отасига миллий хавфсизлик вазирлиги ходими. Ота қизининг туркга эмас Туркиядаги туркман йигитга турмушга чиқаётганини айтган, бироқ миллий хавфсизлик ходими уни эшитишни ҳам истамаган.

«Ҳаммангиз сотқинсиз, фақат Туркманистондан қочиб кетиш ҳақида ўйлайсиз. Қизинг нима учун шу ерда никоҳдан ўтмади? Нима учун ватанда яшаб, шу ерда ишламайди? Сенга ўхшаганлар туфайли мамлакатимиз ёмон деган салбий фикрлар пайдо бўлмоқда», – деб босимни давом эттирган офицер.

Эркак бир соат тергов қилингач унинг мамлакатдан чиқмаслиги маълум қилинган.

Шу куни «Туркман авиалиниялари»нинг Истанбулга учадиган рейсидан яна 8 нафар фуқаро самолётга чиқарилмган ва мамлакатда олиб қолинган.

Аввал хорижга чиқишни истаган фуқаролар Туркманистон миграция хизматига 2 мингдан 5 минггача АҚШ долларида пора бераётгани, хизматда хорижга чиқмайдиган одамларнинг «қора рўйхати» борлиги, Ашхободда уйини сотиб бошқа ерга кўчиб кетмоқчи бўлганларнинг амалдорларга пора беришга мажбур бўлаётгани, шунингдек, туркманистонликларнинг виза учун навбатда туриб, Ўзбекистон ҳудудига ўтиб валюта сотиб олаётганлиги хабар қилинган.