Turkmaniston migratsiya xizmati aeroportda xorijga ketmoqchi bo‘lgan fuqarolarni turli bahonalar bilan besabab ushlab turishda davom etmoqda, deb yozgan “Xronika Turkmenistana”.
Nashrning ma’lum qilishicha, 12-noyabrda yetti nafar bo‘lgan turkmanistonliklar oilasi Ashxoboddan Istanbulga to‘yga uchib ketishi kerak bo‘lgan, ammo migratsiya xizmati xodimlari safarning sababi to‘y ekanini bilgach, bo‘lajak kelinning otasi hamda uning ikki nafar qarindoshining Turkiyaga ketishiga to‘sqinlik qilgan.
Turkmanobodlik erkaklar ushbu taqiq sababini so‘ragan paytda migratsiya xodimi Milliy xavfsizlik vazirligi nozirini chaqirgan. “To‘ychilar”ni alohida xonaga olib kirib, vaziyatni tushuntirish o‘rniga ularni bo‘ralatib so‘kishgan.
“Nima uchun qizingiz turkga turmushga chiqmoqda? Unga turkmanlar yoqmaydimi?”, – deya baqirgan kelinning otasiga milliy xavfsizlik vazirligi xodimi. Ota qizining turkga emas Turkiyadagi turkman yigitga turmushga chiqayotganini aytgan, biroq milliy xavfsizlik xodimi uni eshitishni ham istamagan.
Mavzuga doir: Turkmanistonda xorijda ikkinchi mutaxassislik olish uchun o‘qiyotgan talabalarning pul o‘tkazmalariga cheklovlar tayinlandi
Erkak bir soat tergov qilingach uning mamlakatdan chiqmasligi ma’lum qilingan.
Shu kuni “Turkman avialiniyalari”ning Istanbulga uchadigan reysidan yana 8 nafar fuqaro samolyotga chiqarilmgan va mamlakatda olib qolingan.
Avval xorijga chiqishni istagan fuqarolar Turkmaniston migratsiya xizmatiga 2 mingdan 5 minggacha AQSh dollarida pora berayotgani, xizmatda xorijga chiqmaydigan odamlarning “qora ro‘yxati” borligi, Ashxobodda uyini sotib boshqa yerga ko‘chib ketmoqchi bo‘lganlarning amaldorlarga pora berishga majbur bo‘layotgani, shuningdek, turkmanistonliklarning viza uchun navbatda turib, O‘zbekiston hududiga o‘tib valyuta sotib olayotganligi xabar qilingan.
Izoh (0)