Туркия ва Ўзбекистон ўртасидаги таълим соҳасидаги ҳамкорлик кенгайтирилади. Бу ҳақда Хориждаги турклар ва қардош халқлар бошқармаси (ЙТБ) раҳбари Абдуллаҳ Эрен журналистлар билан учрашувда маълум қилди, деб хабар беради «Дарё» мухбири Севара Нишонова.
Айни кунларда хизмат сафари билан Ўзбекистонда бўлиб турган Абдуллоҳ Эрен Ўзбекистон Олий ва ўрта махсус таълим вазири Ином Мажидов билан учрашиб, ўзаро ҳамкорлик масалаларини муҳокама қилди.
«Олий таълим вазири Ином Мажидов билан учрашдик. Муҳандислик йўналишида таҳсил олаётган талабаларни Туркияда билим ва кўникмаларини оширишга кўпроқ эътибор қаратамиз.
Ҳозирда Туркияда 1000 дан ортиқ ўзбекистонлик талаба таҳсил олмоқда. 10 йил ичида Туркия давлат стипендияси асосида таълим олган талабаларнинг умумий сони 150 кишини ташкил этади. Бу жуда кам кўрсаткич.
Бу йил Туркия давлат стипендияси учун 169 мамлакатдан жами 150 000 киши ҳужжат топширди. Ўзбекистондан топширганлар сони 500 га яқин. Бу жуда оз. Масалан, Қозоғистондан 5000, Афғонистондан 15000 киши ҳужжат топширган. Мурожаат этувчилар сони қанчалик кўпайса, грант соҳиблари ҳам шу қадар кўп бўлади», — дейди Абдуллоҳ Эрен.
Хориждаги турклар ва қардош халқлар бошқармаси раҳбари ўзбекистонлик ёшларига Туркия университетларида бепул ўқиш учун грантлар миқдорини уч бараваргача ошириш режалаштирилаётганини ҳам айтиб ўтди:
«Ўзбекистон сиёсияти, иқтисодиёти, маданияти ҳамда ёшлари билан Марказий Осиё минтақасидаги энг кучли мамлакат. Ислом маданиятининг маънавий бешиги Ўзбекистон Бухоро, Хива, Самарқанд каби шаҳарлари ва буюк алломалари билан жаҳонга машҳур. Мен Миллий университетда бўлиб ёшлар билан учрашдим. Талабаларнинг тўрт— ўзбек, рус, инглиз ва турк тилларида сўзлашаётганига гувоҳ бўлдим. Биз бундай ёшларнинг Туркияга бориб таҳсил олишини ва олган билимларини юрт равнақи йўлида сафарбар этишларини истаймиз.
Шу йилнинг ўзидаёқ ўзбекистонликларга Туркия университетларида бепул ўқиш учун грантлар миқдорини уч бараваргача оширишни режалаштирганмиз».
Абдуллоҳ Эрен Туркия давлат стипендияси асосида таълимни тамомлаганлар учун қандай талаблар қўйилиши ҳақида гапирар экан, ўқиш тугагач, уларнинг Ўзбекистонга қайтиши мажбурий шартлардан бири эканлигини айтди:
«Туркия университетларида грант асосида ўқиётган талабалардан тилхат ёздириб оламиз. Улар ўқиш тугагач, олти ой ичида Ўзбекистонга қайтишлари керак. Уларга қайтиш учун авиачипта ҳам олиб берамиз. Улар Туркияда олган билимларини Ўзбекистон ривожланиши йўлида сафарбар этишларини истаймиз».
«Ўзбекистонлик иқтидорли ёшларнинг Туркияда таҳсил олишига имконият яратиб берган ҳолда икки мамлакат таълим соҳасидаги ҳамкорлигида янги саҳифа очмоқчимиз.
Ўтмиш ўтмишда қолди. Энди олдимизда янги Ўзбекистон ва янги Туркия бор. Бу фаолиятимиз натижасида турк ва ўзбек халқларини ҳам ўзаро яқинлаштириш мақсадидамиз», — дейди сўзларини давом эттириб Абдуллоҳ Эрен.
Маълумот учун, Хориждаги турклар ва қардош халқлар бошқармаси 2010 йилда ташкил этилган.
Бошқарма, асосан, Туркия ташқарисидаги турк диаспораси билан алоқаларни мустаҳкамлаш, қардош халқлар билан муносабатларни кенгайтириш, халқаро талабаларни Туркияда давлат гранти асосида ўқитиш каби учта йўналишда фаолият юритади.
Аввалроқ, Абдуллаҳ Эрен ва Ином Мажидов иқтидорли ёшларга Туркиянинг давлат олий таълим муассасалари бакалавриати, магистратураси ва докторантурасида ўқиш учун Туркия ҳукумати стипендияларини тақдим этиш имконияти, танлов шартлари, ғолибларга яратиладиган шарт-шароитлар муҳокама қилгани ҳақида хабар берилган эди.
Изоҳ (0)