Париж шаҳрида UNESCO 40-юбилей сессиясининг тантанали очилиш маросими бўлиб ўтди, деб хабар бермоқда Туризмни ривожлантириш давлат қўмитаси.
Унда БМТ ва UNESCO раҳбарияти билан бир қаторда Тожикистон, Сербия, Эстония, Латвия, Серра-Леоне ва Мали президентлари, Арманистон, Андорра, Мальта, Тунис каби 14 давлат ва ҳукумат делегациялари иштирок этди. Ўзбекистондан сессия ишида Бош вазир ўринбосари Азиз Абдуҳакимов бошчилигидаги делегация қатнашмоқда.
Анжуманнинг очилишида БМТ Бош котиби Антониу Гуттериш чиқиш қилиб, у асосан инсоният олдида турган муҳим чақириқлар ҳамда уларнинг ечимини топиш учун ҳар томонлама ҳамкорлик алоқаларини мустаҳкамлашнинг аҳамиятига тўхталди.
БМТ Бош котиби ташкилотга аъзо мамлакатларни жагоннинг ҳозирги муаммолари ечимини топиш учун ҳамкорликни мустаҳкамлашда кўп томонлама дипломатиянинг ролини аниқ англаб етишга чақирди. Унинг сўзларига кўра, бу маънода инклюзивликни таъминлаш, яъни халқаро ташкилотларнинг нафақат давлатлар, балки глобал молиявий институтлар, хусусий сектор ва шаҳарлар билан алоқаларини кенгайтириш алоҳида аҳамиятга эга.
Сессия 13 ноябрь куни ўз ишини бошлади. Анжуманнинг асосий тадбири умумсиёсий дебатлар бўлиб, унда делегациялар раҳбарлари, жумладан, Ўзбекистон делегацияси раҳбари ўз маърузаси билан чиқиш қилмоқда.
Изоҳ (0)