Ўзбекистонда қолипли нон нархи сўнгги бир ой ичида икки марта қимматлашгани ва айрим ҳудудларида «буханка» нархи 2500 сўмгача кўтарилгани ҳақида хабар берилган эди. Ўзбекистон Бош прокуратураси «буханка» нархининг ошишига сабаб бўлаётган омилларни таҳлил қилди ва мазкур сабаблар юзасидан расмий баёнот берди. Монополияга қарши курашиш қўмитаси эса биржа савдоларига «қўйилган ун ҳажми» банди бўйича тушунтириш берди.
Монополияга қарши курашиш қўмитаси «Ўзбекистон Республикаси товар-хом ашё биржаси» АЖ билан ҳамкорликда буғдой унини биржа савдоларига қўйилиши устидан мунтазам мониторингни амалга ошириб келмоқда.
Шу билан бирга, жадвал асосида биржа савдоларига қўйилиши режалаштирилган маҳсулотлар тўғрисида кунлик маълумотлар биржанинг сайтида ёритиб борилмоқда.
Жорий йилнинг 15 октябридан 25 октябригача 6 700 тонна, 28ва 29 октябрь кунлари 5 801,6 тонна ва 30 октябрь куни эса 5 796,8 тонна унни биржа савдоларига қўйиш режалаштирилган эди. Нарх ошиши таваккалчилигини пасайтириш мақсадида, савдо ўтказиладиган биринчи ҳафтада савдога қўйиладиган буғдой унининг ҳажмини кўпайтириш бўйича чоралар кўрилган.
Шундай қилиб, 15—18 октябрь кунларида жадвалга мувофиқ 26,8 минг тонна ун савдога қўйилиши керак эди, ҳақиқатда эса кунлар бўйича 37,4 минг тонна буғдой уни сотувга қўйилган. Бундан ташқари, буғдой унини узлуксиз етказиб бериш мақсадида 19, 26 ва 31 октябрь кунларида биржа савдоларига қўшимча яна 16,4 минг тонна буғдой уни қўйилган.
Биржа савдоларининг биринчи ҳафтасида савдоларга жадвалда кўрсатилган ҳажмдан кўпроқ ун қўйилгани сабабли, 23 октябрдан 30 октябргача «Ўздонмаҳсулот» АК томонидан биржа савдоларига қўйилган ун ҳажми камроқ бўлган ва ушбу тўғрисида «Ўздонмаҳсулот» АК томонидан қўмита ва биржа белгиланган тартибда хабардор қилинган.
Шундай қилиб, октябрь ойида биржа савдоларига 94,8 минг тонна буғдой уни қўйилиши керак эди, ҳақиқатда эса 101,6 минг тонна ун қўйилган. Октябрь ойида уннинг ўртача нархи 2 480 сўм/кг тенг бўлиб, ўз навбатида нархнинг энг паст даражаси 2 402 сўм/кг ва энг юқори даражаси 2 579 сўм/кг бўлган.
Жорий йилнинг 1—12 ноябрь кунларида жадвалга асосан биржа савдоларига 137,7 минг тонна ун қўйилиши кўзда тутилган.
Жорий йилнинг 13 ноябрь ҳолатига уннинг ўртача нархи 2 482 сўм/кг, унинг энг паст даражаси 2 431 сўм/кг ва энг юқори даражаси 2 512 сўм/кг ташкил қилган.
Биржа саволарига қўйилган буғдой унини октябрь—ноябрь ойларидаги нархларини таққосланса, уларнинг паст ва юқори даражалари ўртасидаги тафовут октябрь ойида 177 сўм/кг ва ноябрь ойида 30 сўм/кг бўлган. Бундан кўриниб турибдики, биржа савдолари орқали сотилаётган буғдой унининг нархи деярли бир хил.
Изоҳ (0)