Челябинск вилояти Уст-Катав шаҳрида истиқомат қилувчи ўзбекистонлик аёл 6 ноябрь куни полицияга мурожаат қилиб, 20, 15 ва 11 ёшли уч нафар фарзанди йўқолиб қолганини билдирди, деб хабар беради «Эноб».
Маълум бўлишича, эртаси куни уларнинг уйида ёнғин содир бўлган. Воқеа жойидан 55 ёшли аёлнинг ҳеч қандай зўравонлик аломатлари кузатилмаган жасади топилган. Тергов қўмитаси ўз жонига қасд қилиш версиясини ҳозирча тасдиқламаган бўлса ҳам текширувларни бошлаб юборган.
Дастлабки маълумотларга кўра, болаларнинг ўзи онасидан қочиб кетган. Бунга аёл фарзандларини уйда қамаб, мактаб, касалхонага боришига, атрофдагилар билан мулоқот қилишига рухсат бермагани сабаб бўлган. Маҳаллий прокуратура таълим органлари, аҳолининг ижтимоий ҳимояси органларининг, шунингдек, соғлиқни сақлаш ва полициянинг ишини текширишга киришмоқчи.
Гап тикувчи Дина Азизованинг (бошқа маълумотларга кўра Алиева — таҳр.) оиласи ҳақида кетмоқда. Нашрнинг ёзишича, аёл узоқ йиллардан буён (9—11 йил оралиғида) «қамоқ»да сақланган болалари қочиб кетгач, уйни ўзи ёқиб юбориб, жонига қасд қилган. Бу вақтда эса аёлнинг қизлари ва ўғли полицияда бўлган.
Азизова турмуш ўртоғи билан 2000 йиллар бошида Ўзбекистондан кўчиб келган. Оилада жами тўрт нафар фарзанд бўлган. Уларнинг тўнғичи — 33 ёшли Дилёра ҳозирда Татаристонда яшайди. Икки йил олдин болаларнинг отаси ишлаш учун Курган вилоятига жўнаб кетиб, оиласи билан алоқаларини узган. Аёлнинг ўзи уйда тикувчилик билан шуғулланган.
Оиланинг яшаш шароити яхши бўлган. Онасининг йиғган пулларига уй сотиб олишган. Маҳалла нозирининг сўзларига кўра, текширувлар вақтида ҳеч қандай шикоят бўлмаганлиги сабаб уларнинг уйига ҳеч ким кирмаган. Қўшнилар ҳам ҳеч шикоят қилмаган. Кейинроқ маълум бўлишича, улар ҳатто аёлнинг фарзандлари борлигини билишмаган ҳам.
Икки қизи ва ўғлини ўқитиш билан Азизованинг ўзи шуғулланган. 2008 йилдан буён улар ҳақида бирор маълумот бўлмаган. Кенжа фарзанди 11 ойлик бўлганида патронаж хизмати кўрсатилган, холос. Оиланинг отаси ва тўнғич қизи тез-тез қариндош-уруғлари билан гаплашиб турган. Она болалар мактабга бораётганини айтиб келган. Кийим-кечак ва овқатларни Азизованинг фақат ўзи олиб келган.
Аёл нима сабабдан фарзандларини узоқ йиллар яшириб келгани маълум эмас. Версиялардан бирига кўра, у руҳий носоғлом бўлган. Азизова қизлари ва ўғлига «дунё жуда ёмон» ва «у ерда ёмон одамлар кўп» деб тушунтириб келган.
Азизованинг 20 ёшли қизи Дарина онаси билан жанжаллашиб қолган ва калтакланган. Шунда қиз укаси ва синглисини олиб интернетдаги танишининг ёрдами билан қочиб кетган.
Аниқланишича, у онасидан яширин равишда мобил телефон орқали у билан ёзишиб турган. Даринанинг таъкидлашича, онаси уйда йўқ бўлганида у таниши билан учрашиб ҳам турган. Оиланинг тўнғич қизи Дилёранинг сўзларига кўра, эркакнинг ёши 30 да бўлиб, Дарина билан анча йиллардан буён таниш бўлишига, вазиятдан бохабар бўлишига қарамай ҳеч қандай чора кўрмаган.
Натижада Азизованинг фарзандларини полициячилар топиб олган, бироқ улар уйига қайтишни истамаган. Уларни оиланинг тўнғич қизи ва отаси олиб кетишга тайёр. Бироқ болаларнинг фуқаролиги ва ҳужжатлари йўқ.
Изоҳ (0)