13 ноябрдан 16 ноябрга қадар республиканинг айрим ҳудудларида электр энергиясида вақтинча узилишлар бўлади. Бу ҳақда Энергетика вазирлиги матбуот хизмати хабар берди.
Таъкидланишича, «Навоий иссиқлик электр станцияси»нинг 450 МВт қувватга эга 2-сонли буғ-газ қурилмаси (БГҚ) ёқилғи филтрларини тозалаш ва бошқа носозликларни бартараф этиш учун таъмирга чиқарилган. Ушбу буғ-газ қурилмасини пудратчидан қабул қилишдан олдин якуний регламент билан белгиланган ишлар ва синовлар ўтказилади. Синов жараёни 16 ноябрь кунига қадар давом этиши кутилмоқда.
Буғ-газ қурилмасида республикада ишлаб чиқарилаётган электр энергиясининг тахминан 6 фоизини ташкил этади. Шуни инобатга олиб, энерготизим барқарор ишлашини таъминлаш мақсадида, шунингдек, электр энергияси ишлаб чиқариш ва истеъмол балансини таъминлаш учун баъзи ҳудудларда электр таъминотида узилишлар бўлиши мумкин.
Вазирлик келтирилган ноқулайликлар учун истеъмолчилардан узр сўрайди.
Изоҳ (0)