Туркия президенти Ражаб Тоййиб Эрдўғон АҚШ давлат раҳбари Дональд Трамп билан учрашув вақтида октябрда Суриядаги ҳарбий операциялардан олдин Вашингтондан олган шов-шувли хатни ҳамкасбига қайтариб берди. Бу ҳақда «Интерфакс» хабар қилди.
«Мен ўша мактубни АҚШ президенти Трамп жаноби олийларига қайтардим», — дея таъкидлаган Эрдўғон Трамп билан учрашувдан кейинги конференцияда.
АҚШ давлат раҳбари октябрь ойида «Тинчлик булоғи» ҳарбий операцияси бошланишидан аввал Эрдўғонга айрим муаммоларнинг ҳал этилиши учун астойдил ҳаракат қилганлигини айтган ва ундан «бутун дунёга ўз юкини ташламаслик»ни сўраган. Икки томон учун ҳам фойдали келишув амалга ошишга яқинлиги, генерал Мазлум ҳам музокараларга тайёр эканлигини қайд этиб хат ёзган ва илова сифатида курдлар етакчисининг мактубини ҳам Туркия президентига жўнатганди.
Туркия президенти Ражаб Тоййиб Эрдўғоннинг Трамп 9 октябрда «бутун дунёга ўз юкини ташламаслик» ва Сурияда курдларга қарши уруш ҳаракатларини бошламасликни сўраб ёзган хатини ташлаб юборгани хабар қилинганди. Кейинчалик ташлаб юборилган хатнинг сақлаб қўйилганлиги ва Эрдўғон АҚШда ушбу мактубни Трампга қайтариб бериши маълум бўлган.
Эрдўғон Трампга «Сурия демократик кучлари» курд жангарилари террористик ташкилот эканини тушунтирганини ҳам маълум қилди.
«Сурия демократик кучлари» деганда курдларни эслаб ўтдингиз. Лекин улар террорчилик ташкилоти ва Курдистон ишчи партиясининг Суриядаги бўлинмаси», — дейди Эрдўғон.
Шунингдек, Туркия давлат раҳбари Анқаранинг курдлар билан ҳеч бир масалада муаммоси йўқлиги, Туркияда минглаб курдлар мамлакатнинг тенг ҳуқуқли фуқаролари сифатида яшашини билдирди.Эрдўғон ва Трампнинг Оқ уйдаги музокаралари ОАВ учун ёпиқ ҳолда ўтказилди. Икки давлат раҳбарлари ўзаро ҳамкорлик масалаларини бир соат-у 15 дақиқа давомида муҳокама қилган. Туркия президенти америкалик ҳамкасби билан суҳбатдан кейин энди Россия давлат раҳбари Владимир Путин билан ҳам Суриядаги вазиятни муҳокама қилади.
Мавзуга доир: «Тинчлик булоғи» Сурияга тинчлик олиб келадими?
9 октябрда Анқара Сурия шимоли-шарқида Туркиядаги қочоқлар учун хавфсиз зона ташкил этиш мақсадида «Сурия демократик кучлари» курд жангарилари ва ИШИД террорчиларига қарши «Тинчлик булоғи» ҳарбий операциясини бошлаган. Дунё давлатлари туркларнинг ушбу ҳаракатларини қоралаган. АҚШ Туркияга қарши санкциялар қўллади.
17 октябрда Анқара ва Вашингтон Сурия шимоли-шарқидаги операцияни 120 соатга, курдлар хавфсиз зона ҳудудидан чиқиб кетиши учун тўхтатишни келишиб олди ва санкциялар бекор қилинди.
22 октябрда Сочида Россия президенти Владимир Путин ва Туркия давлат раҳбари Ражаб Тоййиб Эрдўғон Сурия ҳудудидаги нотинч вазиятни муҳокама қилди ва «Тинчлик булоғи» операциясини 23 октябрдан яна 150 соатга тўхтатиш ва ўт очмаслик ҳақидаги шартлашув муддати якунига етгач ҳамкорликда Туркия—Сурия чегарасида 30 километрлик ҳудудни барпо этиш учун қўшма патрул тадбирлари ўтказиш ҳақида меморандум имзолади.
1 ноябрда курдларнинг Туркия чегарасидан 30 километр узоқликка чекингани ва улар тарк этган ҳудудни Сочида имзоланган меморандумга мувофиқ Сурия қўшинлари ва Россия ҳарбий полицияси эгаллаши маълум бўлди. 5 ноябрда Туркия ҳамда Россия ҳарбийлари Сурия шимолидаги Айн-ал-Араб аҳоли пунктидаги (Кобани) иккинчи қўшма патрул тадбирларини бошлади. 10 ноябрда Туркия президенти Ражаб Тоййиб Эрдўғон ҳамда Россия президенти Владимир Путин телефон орқали суҳбат қилиб, Суриядаги низоларни ҳал этиш борасида ўзаро фикр алмашган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)