Turkiya prezidenti Rajab Toyyib Erdo‘g‘on AQSh davlat rahbari Donald Tramp bilan uchrashuv vaqtida oktabrda Suriyadagi harbiy operatsiyalardan oldin Vashingtondan olgan shov-shuvli xatni hamkasbiga qaytarib berdi. Bu haqda “Interfaks” xabar qildi.
“Men o‘sha maktubni AQSh prezidenti Tramp janobi oliylariga qaytardim”, — deya ta’kidlagan Erdo‘g‘on Tramp bilan uchrashuvdan keyingi konferensiyada.
AQSh davlat rahbari oktabr oyida “Tinchlik bulog‘i” harbiy operatsiyasi boshlanishidan avval Erdo‘g‘onga ayrim muammolarning hal etilishi uchun astoydil harakat qilganligini aytgan va undan “butun dunyoga o‘z yukini tashlamaslik”ni so‘ragan. Ikki tomon uchun ham foydali kelishuv amalga oshishga yaqinligi, general Mazlum ham muzokaralarga tayyor ekanligini qayd etib xat yozgan va ilova sifatida kurdlar yetakchisining maktubini ham Turkiya prezidentiga jo‘natgandi.
Turkiya prezidenti Rajab Toyyib Erdo‘g‘onning Tramp 9-oktabrda “butun dunyoga o‘z yukini tashlamaslik” va Suriyada kurdlarga qarshi urush harakatlarini boshlamaslikni so‘rab yozgan xatini tashlab yuborgani xabar qilingandi. Keyinchalik tashlab yuborilgan xatning saqlab qo‘yilganligi va Erdo‘g‘on AQShda ushbu maktubni Trampga qaytarib berishi ma’lum bo‘lgan.
Erdo‘g‘on Trampga “Suriya demokratik kuchlari” kurd jangarilari terroristik tashkilot ekanini tushuntirganini ham ma’lum qildi.
“Suriya demokratik kuchlari” deganda kurdlarni eslab o‘tdingiz. Lekin ular terrorchilik tashkiloti va Kurdiston ishchi partiyasining Suriyadagi bo‘linmasi”, — deydi Erdo‘g‘on.
Shuningdek, Turkiya davlat rahbari Anqaraning kurdlar bilan hech bir masalada muammosi yo‘qligi, Turkiyada minglab kurdlar mamlakatning teng huquqli fuqarolari sifatida yashashini bildirdi.Erdo‘g‘on va Trampning Oq uydagi muzokaralari OAV uchun yopiq holda o‘tkazildi. Ikki davlat rahbarlari o‘zaro hamkorlik masalalarini bir soat-u 15 daqiqa davomida muhokama qilgan. Turkiya prezidenti amerikalik hamkasbi bilan suhbatdan keyin endi Rossiya davlat rahbari Vladimir Putin bilan ham Suriyadagi vaziyatni muhokama qiladi.
Mavzuga doir: “Tinchlik bulog‘i” Suriyaga tinchlik olib keladimi?
9-oktabrda Anqara Suriya shimoli-sharqida Turkiyadagi qochoqlar uchun xavfsiz zona tashkil etish maqsadida “Suriya demokratik kuchlari” kurd jangarilari va IShID terrorchilariga qarshi “Tinchlik bulog‘i” harbiy operatsiyasini boshlagan. Dunyo davlatlari turklarning ushbu harakatlarini qoralagan. AQSh Turkiyaga qarshi sanksiyalar qo‘lladi.
17-oktabrda Anqara va Vashington Suriya shimoli-sharqidagi operatsiyani 120 soatga, kurdlar xavfsiz zona hududidan chiqib ketishi uchun to‘xtatishni kelishib oldi va sanksiyalar bekor qilindi.
22-oktabrda Sochida Rossiya prezidenti Vladimir Putin va Turkiya davlat rahbari Rajab Toyyib Erdo‘g‘on Suriya hududidagi notinch vaziyatni muhokama qildi va “Tinchlik bulog‘i” operatsiyasini 23-oktabrdan yana 150 soatga to‘xtatish va o‘t ochmaslik haqidagi shartlashuv muddati yakuniga yetgach hamkorlikda Turkiya—Suriya chegarasida 30 kilometrlik hududni barpo etish uchun qo‘shma patrul tadbirlari o‘tkazish haqida memorandum imzoladi.
1-noyabrda kurdlarning Turkiya chegarasidan 30 kilometr uzoqlikka chekingani va ular tark etgan hududni Sochida imzolangan memorandumga muvofiq Suriya qo‘shinlari va Rossiya harbiy politsiyasi egallashi ma’lum bo‘ldi. 5-noyabrda Turkiya hamda Rossiya harbiylari Suriya shimolidagi Ayn-al-Arab aholi punktidagi (Kobani) ikkinchi qo‘shma patrul tadbirlarini boshladi. 10-noyabrda Turkiya prezidenti Rajab Toyyib Erdo‘g‘on hamda Rossiya prezidenti Vladimir Putin telefon orqali suhbat qilib, Suriyadagi nizolarni hal etish borasida o‘zaro fikr almashgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)