Гонгконгдаги намойишлар сабаб мактаб ва боғчалар вақтинчалик ёпилади (видео)

Гонгконгда давом этаётган норозилик намойишлари сабабли хавфсизликни таъминлаш мақсадида 14 ноябрь куни маҳаллий маориф бюроси қарорига кўра боғча ва мактаблар ёпилади. Бу ҳақда «Интерфакс» хабар берди.

Чоршанбада мактаблар ишлаган. Хитой университетидан 80 га яқин қитъада жойлашган ҳудуддан келган талабалар эвакуация қилинди. Олийгоҳ жойлашган ерда норозилик билдираётган фуқаролар чодирлар тикиб лагер тузган, ушбу масканга уларни қўллаб-қувватлаётган халқ вакиллари егуликлар олиб келмоқда. Намойишчилар университетдаги ошхоналардан бирини лагердагиларга овқат тайёрлаш учун эгаллаб олган.

Чоршанба тонгида лагердаги икки нафар фаолни ноқонуний равишда йиғилишлар ўтказиб, намойиш ташкил этгани учун ҳибсга олинган.

Гонгконгда транспорт фаолияти бузилгани оқибатида банкларнинг 250 та бўлинмаси ҳам фаолиятини вақтинча тўхтатди. Хусусан, HSBC, Standard Chartered Bank va Bank of China (Hong Kong) банкларининг филиаллари ёпилди.

https://twitter.com/i/status/1194497080745590784

Намойиш ўтказаётганлар полиция ҳаракатини секинлаштириш учун йўлларга узун бамбук поялари билан тўсиқлар қўймоқда. Бамбук ходалари икки ғишт устига кўндаланг жойлаштирилиб, бир неч ўн метр масофага тахлаб чиқилмоқда. Қўзғалончилар душанбадан бери янги усул қўлламоқда: мессенжерлар орқали кичик гуруҳларга бўлиниб блокланадиган жой ва кўча номини аниқлаштириб, ўша ерда йўлларни ёпмоқда.

https://twitter.com/i/status/1194517157331161088

Университетга яқин темирйўл бекати вайрон бўлган, қўшни автовокзал ҳам бўм-бўш, кампус ҳудуди чиқиндига айланган соябон бўлаклари, бамбук ёғочлари ва бошқа аҳлат билан қопланган. Шаҳарда бошқа темирйўл бекатлари ҳам ёпилган, автомобиль трассалари ва поезд рельслари ҳам блоклаб ташланган.