Тошкент шаҳрида ИИБ ходимининг хизмат машинасида авария ҳолатини юзага келтиргани тасвирланган видео ижтимоий тармоқларда тарқалди, деб хабар бермоқда «Gazeta.uz».
Унда ИИБ ходимининг давлат рақами 01 067 VSC бўлган хизмат машинасида ўнг томондан қувиб ўтган ҳолда қоида бузгани, сўнг ҳайдовчига йўл бермай авария ҳолатини юзага келтиргани тасвирланган.
Видеорегистратордаги тасвир бўйича воқеа 2019 йил 27 сентябрда, видео муаллифининг айтишига қараганда, 31 октябрда содир бўлган.
Видеорегистратор ўрнатилган машина эгаси бир неча бор ИИБ хизмат машинасидан ўтиб кетишга ҳаракат қилган бўлишига қарамай, ИИБ ходими атайин тормоз босган ҳолда, авария ҳолатини юзага келтирган.
Маъмурий жавобгарлик тўғрисидаги кодекснинг 128-5-моддасига кўра, авария ҳолатини юзага келтириш энг кам иш ҳақининг 10 баравари миқдоридаги жарима солинишига сабаб бўлади. 31 октябрь ҳолатига кўра, ЭКИҲнинг 10 баравари 2 миллион 230 минг сўмга тенг.
Изоҳ (0)