Ўзбекистонда 2022 йилда ўтказилиши кутилаётган аҳолини рўйхатга олиш жараёни учун 1,26 триллион сўм маблағ талаб этилади. Бу ҳақда Давлат статистика қўмитаси раиси Баҳодир Бегалов маълум қилди, дея хабар бермоқда «Дарё» мухбири.
Президент Шавкат Мирзиёевнинг тегишли фармонига мувофиқ, Ўзбекистонда 2022 йилда аҳолини рўйхатга олиш ишлари ўтказилади (2017 йилда жараён 2020 йилда ташкил этилиши мумкинлиги айтилганди). Ушбу жараён, жумладан, аҳоли ва уй-жой фондини рўйхатга олишга тааллуқли халқаро ва ҳудудий тавсияларни инобатга олган ҳолда ўтказилади.
Давлат статистика қўмитасининг дастлабки ҳисоб-китобларига кўра, аҳолини рўйхатга олишни анъанавий қоғоз усулида ўтказиш учун 1,26 триллион сўм талаб этилади. Бу киши бошига 35,4 минг сўм (жорий курс бўйича тахминан 3,7 доллар)дан тўғри келади, дегани. Аҳолини рўйхатга олиш ишларига 150 минг киши жалб қилиниши режалаштирилган.Аввалроқ Давлат статистика қўмитаси бошқарма бошлиғи Қобилжон Бердиқулов аҳолини рўйхатга олиш ишларига жалб этилган фуқаролар билан «Аҳолини рўйхатга олиш тўғрисида»ги қонунда белгиланган тартибда шартнома тузилиши, бунда мажбурий меҳнатга йўл қўйилмаслигини маълум қилган эди. «Аҳолини рўйхатга олиш тўғрисида»ги қонун лойиҳаси Давлат статистика қўмитаси томонидан апрель ойида жамоатчилик муҳокамаси учун эълон қилинган эди.
Ўзбекистон ҳудудида аҳолини рўйхатга олиш ишлари илк бор XIX аср охирида — 1897 йилда амалга оширилган, ўша вақтда аҳоли сони 3,9 миллион бўлган. Сўнгги бор бундай жараён 1989 йилда ўтказилган, бу эса, Президент фармонида таъкидланганидек, «аҳоли сонига, ёш-жинс таркибига кескин таъсир кўрсатган ўзгаришлар, аҳоли жойлашуви хусусиятлари ва бошқа ижтимоий-демографик ўзига хосликлар аҳолининг жорий ҳисобига оид мавжуд маълумотларни қўллашни сезиларли даражада чекламоқда».
Изоҳ (0)