Тошкентдаги Ғафур Ғулом номидаги боғ ва Экопаркка чет элликлар миллионлаб доллар инвестиция киритади

Тошкентдаги тўртта маданият ва истироҳат боғига жами 20 миллион доллар миқдорида инвестиция киритиш бўйича тендер ҳужжатлари тайёрланмоқда. Бу ҳақда Ўзбекистон маданият вазири Камола Оқилова маълум қилди, дея хабар бермоқда «Дарё» мухбири.

Вазирлар Маҳкамасининг 2019 йил 9 июлдаги қарорида давлат-хусусий шериклик асосида берилиши мумкин бўлган 37 та маданият ва истироҳат боғи кўрсатиб ўтилган бўлиб, ҳозир улардан 15 тасини тадбиркорларга бериш бўйича иш олиб борилмоқда.

Хусусан, Тошкентнинг Чилонзор туманидаги Ғафур Ғулом номидаги боғ, Яккасарой туманидаги «Дўстлик» боғи, Мирзо Улуғбек туманидаги Экопаркда амалга ошириш учун тақдим этилган лойиҳаларга доир 20 миллион доллар инвестиция киритиш бўйича тендер ҳужжатлари тайёрланмоқда.

Маҳаллий тадбиркорлар томонидан 11 та боғда жами 36,2 миллиард сўмлик лойиҳаларни амалга ошириш бўйича Маданият вазирлигига вазирлигига таклифлар киритилган. Хусусан, Андижонда 2 та (7,2 миллиард сўм), Сурхондарёда битта (4,7 миллиард сўм), Самарқандда 2 та (6 миллион доллар), Фарғонада 6 та (18,3 миллиард сўм) лойиҳа амалга оширилиши режалаштирилган.

Аввалроқ Тошкент шаҳар ҳокимлиги Абдулла Қодирий боғида япониялик инвесторлар билан ҳамкорликда беш қаватли меҳмонхона мажмуаси қуриш бўйича келишувга эришгани маълум бўлганди. Лойиҳанинг биринчи босқичдаги қиймати 13 миллион долларга тенг.