Вазирлар Маҳкамасининг умумий ўрта таълим мактабларида ҳарбий-ватанпарварлик йўналишига ихтисослаштирилган синфлар ташкил этилиш тўғрисидаги қарори лойиҳаси муҳокамага қўйилди.
Миллий гвардия ва Халқ таълими вазирлигининг умумий ўрта таълим мактабларининг ҳарбий-ватанпарварлик йўналишига ихтисослаштирилган синфлари фаолиятини 7—11-синф ҳажмида ташкил этиш тўғрисидаги таклифига розилик берилиши мумкин.
Қарорга кўра:
- умумий ўрта таълим мактабларининг ҳарбий-ватанпарварлик йўналишига ихтисослаштирилган синфларида ўқиш муддати беш йилдан иборат бўлади;
- 2019—2020-ўқув йилида ихтисослаштирилган синфларга 7-синфдан бошлаб 30 нафар ўқувчи қабул қилинади;
- ихтисослаштирилган синфлар учун керак бўладиган махсус спорт жиҳозлари, ўқув мақсадларга мўлжалланган қурол-аслаҳа ва ҳарбий-техник мулк намуналари ва параметрлари Миллий гвардия томонидан ишлаб чиқилади;
- ихтисослаштирилган синфларда ўқув машғулотларининг ташкил этилиши учун зарур шароитлар яратиш ва махсус ҳарбий-техник ва қурол-аслаҳалардан фойдаланиш бўйича амалий машғулотлар Халқ таълими вазирлиги ва Миллий гвардия томонидан белгиланган тартибда амалга оширилади.
Шунингдек, қарор билан ҳар йилнинг 1 августига қадар қабул жараёнлари учун жисмоний тайёргарлик топшириқларини тайёрлаш ва тест синовлари учун зарур шарт-шароитларни яратиш, ихтисослаштирилган синфлар учун ўқув режа ва дастурларни замонавий талаблар асосида такомиллаштириш, айрим фанларни чуқурлаштирилиб ўқитилишини жорий этиш билан бирга ўқувчиларнинг қўшимча равишда мустақил билим олишлари учун етарлича шароитлар яратиш белгилаб берилган.
Умумий ўрта таълим мактабларининг ҳарбий-ватанпарварлик йўналишига ихтисослаштирилган синфлари тўғрисидаги низомга кўра, умумий ўрта таълим фанлари доирасида ҳарбий-ватанпарварлик йўналиши бўйича ўқувчиларнинг давлат таълим стандартлари талабларидан ошадиган чуқур таълим тайёргарлигини таъминлаш ихтисослаштирилган синфларнинг мақсади ҳисобланади.
Ихтисослаштирилган синфларда таълим 7—11-синф ҳажмида бўлиб, кундузги таълим шаклида амалга оширилади. Таълим ўзбек, қорақалпоқ ва рус тилларида олиб борилади.
Ихтисослаштирилган синфларда ўқув-тарбия жараёни Давлат таълим стандартлари талаблари асосида ташкил қилинади.
Ўқув йили якуни бўйича қониқарсиз натижа кўрсатган ихтисослаштирилган синфларнинг ўқувчилари мактаб педагогик кенгаши қарори билан умумий ўрта таълим мактабининг умумий синфларига ўқишни давом эттириш учун ўтказилади.
Ўқувчиларнинг ота-оналари ёки уларнинг ўрнини босувчи шахсларнинг эҳтиёжидан келиб чиқиб, ихтисослаштирилган синфларнинг ўқувчиларини дарсдан ташқари машғулотларга тўлиқ жалб этилишига қўшимча шароитлар яратиш мақсадида шартнома асосида кузатув кенгашлари томонидан ўқувчиларнинг соғлом овқатлантирилишини ташкил этилиши мумкин. Ихтисослаштирилган синфларнинг 9-синфини якунлаган ўқувчиларга умумий ўрта таълим тўғрисида шаҳодатнома, 11-синфини тамомлаган ўқувчиларга умумий ўрта таълим тўғрисида аттестат берилади.
Изоҳ (0)