Пойтахт ИИББ ходими ўз ҳаётини хавф остига қўйиб қидирувдаги шахсни ушлади

Тошкент шаҳар ИИББ ходими ўз ҳаётини хавф остига қўйиб, автомобиль олиб қочганликда гумонланган ва Тошкент вилоятидаги ҳамкасбларининг қидирувида бўлган шахсни тўхтатди, деб хабар берди пойтахт ИИББ матбуот хизмати.

Тошкент вилоятида 29 ёшли Феруз М. 25 ёшли Абубакир Т.га тегишли бўлган Lacetti русумли автомобилни олиб қочди. Ушбу факт асосида Ўзбекистон Жиноят кодексининг 267-моддаси (Транспорт воситасини олиб қочиш) бўйича жиноий иш қўзғатилди. Гумонланувчини қўлга олиш бўйича чоралар кўриш тадбирлари бошланди.

27 октябрь куни тахминан соат 06:15 да, давлат рақамлари олиб қочилган автомобилники билан бир хил бўлган транспорт воситаси Чилонзор туманидаги Бунёдкор кўчасида ЙПХ ва ППХ ходимларининг назарига тушди. Аммо ҳайдовчи ходимларнинг транспорт воситасини тўхтатиш ҳақидаги қонуний талабини бажармасдан, ҳаракатни давом эттирди.

Чилонзор тумани ИИО ФМБ жамоат тартибини сақлаш бўлинмаси бошлиғи подполковник Тоҳир Рихсиев енгил машинада навбатчилик олиб бораётганда олиб қочилган автомобилни кўриб қолади.

«Ҳайдовчи қочишга уринганига қарамасдан, ўз автомобилида уни йўлни четига қисиб тўхтатган Рихсиев Т. томонидан қўлга олинди.

Тошкент шаҳар ИИББ раҳбарияти фидокор ходимни тақдирлашга қарор қилди», — дейилади хабарда.