«Фарзанди кўз олдида хўрланган аёл» номли сарлавҳа билан фуқаро Ш.О.нинг Ўзбекистон Президентига йўллаган видеомурожаати 26 октябрь куни ижтимоий тармоқларда тарқалган эди. «Zarnews»нинг хабар беришича, мазкур ҳолат Қашқадарё вилояти ички ишлар бошқармаси томонидан тезкор ўрганилган.
Унга кўра, мурожаат Яккабоғ тумани ИИБ навбатчилик қисмида рўйхатдан ўтказилиб, терговга қадар текширув ҳаракатлари туман ИИБ ҳуқуқбузарликлар профилактикаси бўлими инспектори томонидан олиб борилган.
Аниқланишича, терговга қадар текширув ҳаракатлари давомида фуқаро С.О. кўп миқдорда спиртли ичимлик истеъмол қилиб, 25 июнь кунидан 26 июнь кунига ўтар кечаси ўта маст ҳолатда бўлганлиги сабабли қўшниси Ш.О.нинг уйига кирган. Ўз навбатида, С.О.ни кўрган аёл унга қаршилик кўрсатиб, қўл кўтарган. Шундан сўнг С.О. ҳам аёлни бир неча маротаба уриб, уйдан қочиб чиқиб кетган. Ҳолат юзасидан йиғилган ҳужжатлар тўплами орқали С.О. қўшни аёлнинг номусига тегиш ва унинг мол-мулкини эгаллашга қаратилган ҳаракатларни содир қилмаганлиги исботланган.
Фуқаро Ш.О. ҳам ўзининг дастлабки кўрсатмаларида С.О. унинг номусига тегишга қаратилган ҳаракатларни содир қилмаганлигини ва фақатгина унинг танасини турли жойларига уриб, сўнг уйдан қочиб чиқиб кетганлигини баён қилган.
Ҳолат юзасидан тайинланган судга оид тиббиёт экспертизасининг хулосасида Ш.О.нинг танасидаги жароҳатлар оғирлик даражасига кўра, соғлиқнинг қисқа муддат ёмонлашувига олиб келмаган, енгил тан шикасти гуруҳига кириши кўрсатилган.
Туман ИИБ ходимлари томонидан ҳолат юзасидан жамланган ҳужжатлар тўплами Яккабоғ тумани прокурори ва маъмурий суди томонидан ўрганиб чиқилгандан сўнг 2019 йил 30 сентябрь куни қўшимча терговга қадар текширув ҳаракатларини ўтказиш учун Яккабоғ тумани ИИБга юборилган.
Ҳозирда мазкур ҳолат юзасидан терговга қадар текширув ҳаракатлари Яккабоғ тумани ИИБ профилактика инспектори томонидан олиб борилмоқда.
Изоҳ (0)