Тошкентда автомобиль эҳтиёт қисмларни олиб бериш билан боғлиқ бир неча фирибгарлик ҳолатлари аниқланди

Тошкентда автомобиль учун эҳтиёт қисмларни олиб бериш билан боғлиқ бир неча фирибгарлик ҳолатлари аниқланди, деб хабар бермоқда ИИББ матбуот хизмати.

Хусусан, Яккасарой тумани ички ишлар органларига 50 ёшли Д.А. ариза билан мурожаат қилиб, 27 ёшли А.Й.га нисбатан чора кўришни сўраган.

Унинг мурожаатига кўра, А.Й. 29 март куни унга Epica русумли автомобиль учун эҳтиёт қисмлар олишда ёрдам беришини ваъда қилган. Бунинг учун у Д.А.дан 2 500 доллар олган. Аммо ваъдасида турмасдан, пулларни ўз эҳтиёжларига сарфлаган.

Шунга ўхшаш ҳолат 24 октябрь куни Миробод тумани ИИОда қайд этилган. 2017 йил 30 октябрдан 2018 йил августгача бўлган давр мобайнида 38 ёшли Р.Й. 29 ёшли Д.Й.га Хитойдан турли автомобиллар учун эҳтиёт қисмларини олиб келишини ваъда қилган. Бунинг учун у Д.Й.дан 16 450 доллар олган. Аммо Р.Й. ўз ваъдасида турмасдан, пулларни эҳтиёжига сарфлаб юборган.

Ҳар икки ҳолат юзасидан Жиноят кодексининг 168-моддаси («Фирибгарлик») бўйича жиноий иш қўзғатилган.