Россиянинг Байкалорти ўлкасида, Горний ёпиқ маъмурий-ҳудудий тузилмасида муддатли хизматни ўтаётган аскар 8 нафар хизматдошини отиб ўлдирди. Бу ҳақда Meduza хабар бермоқда.
20 яшар Рамиль Шамсутдинов навбатчилик алмашиши чоғида хизмат қуролидан ўт очган.
Ҳалок бўлганлар орасида 2 нафар зобит, 5 нафар муддатли хизматдаги ва бир нафар шартнома асосидаги аскар бўлган. Яна икки киши оғир жароҳат олган.
Рамиль Шамсутдинов аввалига зобитлардан бирига ўқ узгани, унинг ёнидагилар пастга ётиб олганида уларни ҳам отиб ташлагани айтилмоқда.
Ҳозирда Шамсутдинов қўлга олинган, яқин орада у комплекс психологик-психиатрик экспертизага юборилиши билдирилган.
Россия мудофаа вазирлиги аскар шахсий сабаблар билан боғлиқ асабий зўриқиш туфайли ўт очганини таъкидлаган бўлса, ОАВ мазкур ҳолатга ҳарбий қисмдаги низомдан ташқари муносабатлар ва миллатчилик кўринишлари сабаб бўлганини тахмин қилган.
Тергов қўмитаси ҳодиса юзасидан жиноий иш қўзғади.
Изоҳ (0)