Ироқда норозилик иштирокчилари вилоят ҳокимлиги биносини ёқиб юборди

Ироқда ҳукуматга қарши намойишлар ўтказаётган аҳоли вакиллари партиялар офиси ва вилоятларнинг бирида ҳатто маҳаллий ҳокимлик биносини ёқиб юборди, деб хабар бермоқда «ТАСС».

Хабарга кўра, манифест ўтказаётган халқ Ан-Насирия шаҳридаги Ди-Кар вилояти ҳокимияти биноси олдида тўпланган ва Бағдоддан жанубда, 350 километр узоқликдаги ушбу жойда ҳукумат бош вазири Одил Абдул Маҳдийнинг истеъфосини талаб қилган. Ҳуқуқ-тартибот идоралари ходимлари билан тўқнашув натижасида норозиликлар иштирокчилари ҳокимлик биносига бостириб кирган ва уни ёқиб юборган.

Ал-Мутанна вилоятининг Ас-Самава шаҳрида эса Аммар ал-Ҳакимий бошқарувидаги шиаларнинг «Ҳикма» партияси офиси ҳамда Қайс ал-Ҳазолий раҳбарлик қилувчи «Асаиб Аҳил-ал-Ҳақ» ярим ҳарбий шиалар ҳаракатининг ваколатхонаси ёқиб юборилган. Васит вилоятида ҳам шунга ўхшаш ҳолатлар кузатилган: бу ерда шиаларнинг собиқ бош вазир (2006—2014 йилларда ҳукуматни бошқаргам) Нурий ал-Маликий бошқарадиган «Қонуний давлат» коалицияси биносига ўт қўйилган.

Шунингдек, норозиликлар вақтида одамлар Ироқ ва Кувайт чегарасидаги «Савфон» назорат-рухсатнома пунктини ҳам ёпиб қўйган. Бу ердаги намойишларда терминалга олиб борадиган йўлда шиналар ёқилмоқда.

Намойишчилар Майсан вилоятидаги Ал-Амара шаҳридаги «Асайиб Аҳил ал-Ҳақ» ҳарбий гуруҳининг биносини ҳам ёқишга уриниб кўрди. Бино қўриқчилари қўзғалончиларга қараб ўқ узиши натижасида норозилик билдираётганларнинг олти нафари жароҳат олган.

Яна қайта бошланган намойишлар вақтида ҳозиргача икки нафар одам ҳалок бўлган ва 90 га яқин одам турли тан жароҳатлари олган. Бир неча минг нафарга етган намойишчилар Бағдоддаги Таҳрир марказида тўпланиб, яхши қўриқланадиган хориж элчихоналари ва ҳукумат муассасалари жойлашган «яшил зона» Ал-Жумҳуррия кўприги томонга ҳаракатланган.

Акция иштирокчилари хавфсизлик кучлари қаршилигини енгиб ўтишга уринган, аммо қонун посбонлари кўзни ёшлантирувчи газни қўллаб уларни ушбу ҳудуддан узоқлаштирган.