Наманганда Hyundai тижорат автомобиллари ишлаб чиқариш заводини қуриш жадаллаштирилади. Вилоят ҳокими Хайрулло Бозоров 24 октябрь куни Тошкентда лойиҳада иштирок этаётган Жанубий Корея компаниялари раҳбарлари билан учрашиб, қўшимча инвестиция шартномасини имзолади. Бу ҳақда «Дарё» мухбири Азизбек Абдувалиев хабар бермоқда.
Шартномага вилоят ҳокими Хайрулло Бозоров, Hyundai Motor компанияси тижорий автомобиллар бўлинмаси вице-президенти Лим Хён Юнг, Hyundai Corporation компанияси тижорий автомобиллар ва темир йўллар бўйича бош директори Пак Ёнг Хван ҳамда Evergreen Motors компанияси вице-президенти Ким Ик Дон қўл қўйди.
Мазкур ҳужжатга кўра, «Наманган» эркин иқтисодий зонаси ҳудудидан жой оладиган Hyundai тижорат автомобиллари ишлаб чиқариш қўшма корхонасига лойиҳани амалга ошириш жараёнида ҳамда келгуси фаолиятида ЭИЗ иштирокчиларига берилган солиқлар ва божхона тўловлари бўйича имтиёзлар татбиқ этилади. Йил якунига қадар лойиҳани амалга ошириш чора-тадбирлари бўйича махсус қарор ҳам қабул қилинади.
Шартномада Hyundai тижорат автомобиллари ишлаб чиқариш заводидан илк маҳсулотнинг чиқиши 2020 йилнинг биринчи ярим йиллигида амалга ошиши белгилаб олинди.
Маълумот учун, Жанубий Корея компаниялари вакиллари билан Hyundai тижорат автомобиллари ишлаб чиқариш лойиҳасини амалга ошириш бўйича инвестицион шартнома 2018 йил ноябрида имзоланганди. Автозаводда йилига 2,5 мингта кичик юк машинаси, микроавтобус ҳамда автобуслар ишлаб чиқарилиши кўзда тутилган. Корхона тўла ишга тушгач 1000 дан ортиқ янги иш ўрни яратилади.
Изоҳ (0)