Namanganda Hyundai tijorat avtomobillari ishlab chiqarish zavodini qurish jadallashtiriladi. Viloyat hokimi Xayrullo Bozorov 24-oktabr kuni Toshkentda loyihada ishtirok etayotgan Janubiy Koreya kompaniyalari rahbarlari bilan uchrashib, qo‘shimcha investitsiya shartnomasini imzoladi. Bu haqda “Daryo” muxbiri Azizbek Abduvaliyev xabar bermoqda.
Shartnomaga viloyat hokimi Xayrullo Bozorov, Hyundai Motor kompaniyasi tijoriy avtomobillar bo‘linmasi vitse-prezidenti Lim Xyon Yung, Hyundai Corporation kompaniyasi tijoriy avtomobillar va temir yo‘llar bo‘yicha bosh direktori Pak Yong Xvan hamda Evergreen Motors kompaniyasi vitse-prezidenti Kim Ik Don qo‘l qo‘ydi.
Mazkur hujjatga ko‘ra, “Namangan” erkin iqtisodiy zonasi hududidan joy oladigan Hyundai tijorat avtomobillari ishlab chiqarish qo‘shma korxonasiga loyihani amalga oshirish jarayonida hamda kelgusi faoliyatida EIZ ishtirokchilariga berilgan soliqlar va bojxona to‘lovlari bo‘yicha imtiyozlar tatbiq etiladi. Yil yakuniga qadar loyihani amalga oshirish chora-tadbirlari bo‘yicha maxsus qaror ham qabul qilinadi.
Shartnomada Hyundai tijorat avtomobillari ishlab chiqarish zavodidan ilk mahsulotning chiqishi 2020-yilning birinchi yarim yilligida amalga oshishi belgilab olindi.
Ma’lumot uchun, Janubiy Koreya kompaniyalari vakillari bilan Hyundai tijorat avtomobillari ishlab chiqarish loyihasini amalga oshirish bo‘yicha investitsion shartnoma 2018-yil noyabrida imzolangandi. Avtozavodda yiliga 2,5 mingta kichik yuk mashinasi, mikroavtobus hamda avtobuslar ishlab chiqarilishi ko‘zda tutilgan. Korxona to‘la ishga tushgach 1000 dan ortiq yangi ish o‘rni yaratiladi.
Izoh (0)