Андижон вилояти Олтинкўл туманининг Жалабек қишлоғида уйи бузилган фуқароларга ер ва компенсация пуллари ҳокимият томонидан бир неча йилдан бери берилмаяпти. Бу ҳақда «Севимли» телеканалининг «Замон» ахборот дастурида намойиш этилган лавҳада ҳикоя қилинади.
Лавҳада таъкидланишича, қишлоқда 83 та уй бузилишга тушган ва уларнинг компенсация пуллари тўлиқ тўлаб берилмаган ҳамда ер ажратилмаган. Фуқароларнинг ўзида маблағ йўқлиги сабабли улар янги уй қура олмаяпти.
Қишлоқда яшовчи Насиба Қўзибоеванинг сўзларига кўра, беш йилдан бери ушбу муаммо ечимсиз қолмоқда.
«Қўштепа» маҳалла фуқаролар йиғини раисининг айтишича, Олтинкўл тумани ҳокими фуқароларга тўрт сотихдан ер ажратиб беришни режалаштирган ва бу ишларни туман пахта режасини бажарганидан кейин амалга ошириш кўзланмоқда.
Олтинкўл туман ҳокимлигининг ер ресурслари ва давлат кадастри бўлими раҳбари Муҳиддин Акбаровнинг маълум қилишича, мазкур маҳалладаги уйи бузилган аҳолининг муаммолари туман ер бериш комиссияси томонидан ўрганилмоқда ва уларнинг муаммолари тез кунларда ҳал қилинади.
Изоҳ (0)