Бўстонлиққа тўққиз ойда 3 миллиондан ортиқ сайёҳ ташриф буюрди

2019 йилнинг дастлабки тўққиз ойи давомида Тошкент вилоятининг Бўстонлиқ туманига 3,2 миллион сайёҳ ташриф буюрган. Бу ҳақда Тошкент вилояти ҳокими Рустам Холматовнинг Invest in Tashkent Region халқаро инвестиция форуми доирасида ташкил этилган очиқ мулоқотда маълум қилди, дея хабар бермоқда «Дарё» мухбири Севара Нишонова.

«Бу йилнинг илк тўққиз ойи давомида 3,2 миллион нафар ташқи ва ички туристлар Бўстонлиқ туманида бўлиб, дам олди. Йил охиригача ушбу кўрсаткич 4 миллион нафарга етади, деб ҳисоблаяпмиз. Биз бу сайёҳлар учун жуда ҳам замонавий шароитлар яратишимиз керак. Ҳозирги кундаги асосий вазифаларимиздан бири шу, биз бунин устида ишлаяпмиз», — деди Тошкент вилояти раҳбари.

Ҳоким форумнинг очилиш маросимидаги маърузасида вилоятнинг умуман сайёҳлик салоҳияти ҳақида тўхталаркан, жумладан, шундай деди:

«Вилоятнинг юқори туристик салоҳияти қулай иқлим шароити, ноёб фауна ва флора, яхши ривожланган туризм инфратузилмаси, ‘Чорвоқ‘ эркин туристик зонаси, шунингдек ҳудуддаги 156 та турли йўналишдаги дам олиш масканларини мавжудлиги билан белгиланади.

Улар орасида сиҳатгоҳлар, меҳмон уйлари, оромгоҳлар, спорт масканлари мавжуд. Ушбу хилма-хиллик маданий, тарихий, экологик, тиббий, зиёрат ва туризмнинг бошқа турларини ривожлантиришга имкон беради».

Аввалроқ Бош прокуратура ҳузуридаги Департамент ташаббуси Бўстонлиқ тумани Сойлиқ қишлоғида меҳмонхона ташкил этиб, мижозларга хизмат кўрсатаётган 50 нафар фуқаро якка тартибдаги тадбиркор сифатида давлат рўйхатидан ўтказилгани, уларга Туризм департаменти томонидан сертификатлар берилгани, 50 дан зиёд янги иш ўринлари яратилгани ҳақида хабар берилган эди.

Октябрь ойида эса Бўстонлиқнинг сайёҳлар орасида энг талабгир ҳисобланган «Дўстлиқ», «Сижжак», «Новобод» маҳалла фуқаролар йиғинларида солиқ таянч пунктларини очиш, топчанлардан тортиб отлар ва сноуборд анжомларини ижарага беришгача бўлган фаолиятларнинг бари учун алоҳида-алоҳида солиқ солишдек «ноёб тажриба»ни бошлаш таклиф қилинаётгани маълум бўлган эди.

Маълумот учун, Тошкент вилоятининг маъмурий маркази Нурафшон шаҳрида 25—26 октябрь кунлари Invest in Tashkent Region халқаро инвестицион форуми бўлиб ўтмоқда. Форум иштирокчилари Чорвоқ тоғ-курорт мажмуаларида «Саноат», «Қишлоқ хўжалиги» ва «Туризм» йўналишлари бўйича иш олиб бормоқда.

Форумнинг биринчи куни — 25 октябрь оқшомида битимларни имзолаш маросими ўтказилиши, 26 октябрда эса форум меҳмонларини Тошкент вилоятининг саноат ва маданий-тарихий объектларга сафарларини ташкил этиш режалаштирилган.