2019-yilning dastlabki to‘qqiz oyi davomida Toshkent viloyatining Bo‘stonliq tumaniga 3,2 million sayyoh tashrif buyurgan. Bu haqda Toshkent viloyati hokimi Rustam Xolmatovning Invest in Tashkent Region xalqaro investitsiya forumi doirasida tashkil etilgan ochiq muloqotda ma’lum qildi, deya xabar bermoqda “Daryo” muxbiri Sevara Nishonova.

“Bu yilning ilk to‘qqiz oyi davomida 3,2 million nafar tashqi va ichki turistlar Bo‘stonliq tumanida bo‘lib, dam oldi. Yil oxirigacha ushbu ko‘rsatkich 4 million nafarga yetadi, deb hisoblayapmiz. Biz bu sayyohlar uchun juda ham zamonaviy sharoitlar yaratishimiz kerak. Hozirgi kundagi asosiy vazifalarimizdan biri shu, biz bunin ustida ishlayapmiz”, — dedi Toshkent viloyati rahbari.

Hokim forumning ochilish marosimidagi ma’ruzasida viloyatning umuman sayyohlik salohiyati haqida to‘xtalarkan, jumladan, shunday dedi:

“Viloyatning yuqori turistik salohiyati qulay iqlim sharoiti, noyob fauna va flora, yaxshi rivojlangan turizm infratuzilmasi, ‘Chorvoq‘ erkin turistik zonasi, shuningdek hududdagi 156 ta turli yo‘nalishdagi dam olish maskanlarini mavjudligi bilan belgilanadi.

Ular orasida sihatgohlar, mehmon uylari, oromgohlar, sport maskanlari mavjud. Ushbu xilma-xillik madaniy, tarixiy, ekologik, tibbiy, ziyorat va turizmning boshqa turlarini rivojlantirishga imkon beradi”.

Avvalroq Bosh prokuratura huzuridagi Departament tashabbusi Bo‘stonliq tumani Soyliq qishlog‘ida mehmonxona tashkil etib, mijozlarga xizmat ko‘rsatayotgan 50 nafar fuqaro yakka tartibdagi tadbirkor sifatida davlat ro‘yxatidan o‘tkazilgani, ularga Turizm departamenti tomonidan sertifikatlar berilgani, 50 dan ziyod yangi ish o‘rinlari yaratilgani haqida xabar berilgan edi.

Oktabr oyida esa Bo‘stonliqning sayyohlar orasida eng talabgir hisoblangan “Do‘stliq”, “Sijjak”, “Novobod” mahalla fuqarolar yig‘inlarida soliq tayanch punktlarini ochish, topchanlardan tortib otlar va snoubord anjomlarini ijaraga berishgacha bo‘lgan faoliyatlarning bari uchun alohida-alohida soliq solishdek “noyob tajriba”ni boshlash taklif qilinayotgani ma’lum bo‘lgan edi.

Ma’lumot uchun, Toshkent viloyatining ma’muriy markazi Nurafshon shahrida 25—26-oktabr kunlari Invest in Tashkent Region xalqaro investitsion forumi bo‘lib o‘tmoqda. Forum ishtirokchilari Chorvoq tog‘-kurort majmualarida “Sanoat”, “Qishloq xo‘jaligi” va “Turizm” yo‘nalishlari bo‘yicha ish olib bormoqda.

Forumning birinchi kuni — 25-oktabr oqshomida bitimlarni imzolash marosimi o‘tkazilishi, 26-oktabrda esa forum mehmonlarini Toshkent viloyatining sanoat va madaniy-tarixiy obyektlarga safarlarini tashkil etish rejalashtirilgan.