Тошкент вилоятининг Бўстонлиқ тумани туристик салоҳияти ва жозибадорлигини ошириш бўйича Президент қарори лойиҳаси тайёрланмоқда. Бу ҳақда вилоят ҳокими Рустам Холматов 25 октябрь куни Invest in Tashkent Region халқаро инвестицион форуми доирасида ташкил этилган очиқ мулоқотда маълум қилди, дея хабар бермоқда «Дарё» мухбири Севара Нишонова.
Ҳокимнинг қайд этишича, қарор Бўстонлиқдаги Чимён, Билдирсой, Чорвоқ, Оқтош каби дам олиш зоналарида амалга ошириладиган ишлар кўламини белгилаб беради.
Бўстонлиқ бўйича муҳтарам Президентимизнинг жуда катта, кенг қамровли қарорлари тайёрланяпти, яқинда эълон қилинади. Унда нафақат Чимён, балки Билдирсой, Чорвоқ ва Оқтош йўналишлари бўйича амалга ошириладиган жуда катта ишлар белгилаб берилади.Президент Шавкат Мирзиёев 2017 йил 16 август куни имзолаган қарори билан Туризмни ривожлантириш давлат қўмитаси, Иқтисодиёт вазирлиги ва қатор банкларнинг Бўстонлиқда тоғ кластерларини босқичма-босқич ташкил этиш тўғрисидаги таклифини маъқуллаган эди.Бўстонлиқ туманининг жозибадорлигини оширишга қаратилган мазкур қарорда коммуникация, канализация, сув таъминоти, дам олиш масканлари, меҳмонхоналар ва ҳоказо бошқа масалаларнинг бари лойиҳа асосида, тизимли равишда ҳал этилиши кўзда тутилади.
Рустам Холматов, Тошкент вилояти ҳокими
Ўша йил октябрида ўтказилган йиғилишда эса Бўстонлиқда, худди Паркент ва Оҳангарон-Ангрендаги каби, туризм кластерлари ҳудудларида меҳмон уйларини ташкил этиш бўйича чора-тадбирлар ишлаб чиқилиб, амалиётга жорий этилаётгани айтилган эди.
Маълумот учун, Invest in Tashkent Region халқаро инвестицион форуми 25—26 октябрь кунлари Нурафшонда бўлиб ўтади. Унда 40 дан ортиқ мамлакатдан 350 га яқин меҳмон — ҳукумат делегациялари, инвесторлар ва бизнес вакиллари иштирок этмоқда.
Тошкент вилояти ҳокими ўринбосари Жамшид Абдусаломовнинг сўзларига кўра, форум ишчи сессиялари натижаларига кўра, тузилган шартномаларнинг умумий суммаси 700 миллион доллардан ошган.
Изоҳ (0)