Хоразм вилоят Урганч туман марказида жойлашган 2-МТТ 10 кун давомида кузатув камерасига тушган. Видеода муассаса тарбиячиси Севара Султонова болаларни калтаклаб келганини кўриш мумкин, деб хабар беради «XorazmNews» канали.
Ота-оналарнинг айтишича, кузатув камераси хотирасида сақланадиган 15 кунлик ёзувларда 4 яшар болалар гуруҳига тарбиячилик қилаётган Севара Султонованинг болаларни чизғич билан уриши, қаттиқ чимчилаши, шунингдек, болаларга овқат бермасдан, соатлаб телефонда гаплашиб ўтириши акс этган.
Мактабгача таълим вазирлиги Урганч тумани 2-сон мактабгача таълим ташкилотидаги ҳолат юзасидан дастлабки ўрганиш бўйича расмий маълумот берди. Ҳолат юзасидан барча зарур чораларни кўриш ҳамда МТТдаги кузатув камераларидаги мавжуд видеотасвирлар далил сифатида, болаларга нисбатан қўлланилган ноқонуний хатти-ҳаракатлар юзасидан тегишли ҳуқуқ-тартибот идораларига қонуний чора кўриш учун мавжуд маълумотларни тақдим қилиш мақсадида МТТдаги видеокузатув камераси хотираси сақланган хона муҳрланган.
Ҳолат юзасидан барча маълумот ва ахборотни тақдим қилиш учун 25 октябрь куни соат 16:00 да Урганч туманидаги 2-сон МТТдаги тарбияланаётган болалар ота-оналари ҳамда ушбу МТТ кузатув кенгаши аъзолари учун умумий йиғилиш чақирилиши белгиланган.
Таъкидланишича, болаларга нисбатан ноқонуний хатти-ҳаракат олиб борган ва куч ишлатган тарбиячига нисбатан қонуний чора кўриш бўйича ариза билан Хоразм вилоят прокуратураси ва Урганч тумани прокуратурасига мурожаат қилинади.
Изоҳ (0)