Сиёсатчи ва Бангладеш парламенти депутати, «Авами лиг» ҳукмрон партияси аъзоси Таманна Нусрат ўзининг ўрнига имтиҳонларни топшириши учун саккиз нафар қиёфадош аёлни ёллагани учун университетдан ҳайдалди, деб ёзмоқда «Интерфакс».

Хабарга кўра, парламент аъзоси қиёфаси ўзига ўхшаш аёллардан камида 13 та йўналишда имтиҳонлардан ўтиб олишда фойдаланган.

Депутатнинг хийласи Nagorik TV телеканали мухбири имтиҳонлардан репортаж тайёрлаш мақсадида университетга келиб сохта Нусратга мавзу юзасидан савол берган вақтда фош бўлиб қолди.

Таманна Нусрат Бангладеш очиқ университетида бакалавр даражасини олганди, аммо олийгоҳ раҳбари унинг жиноят қилганлигини айтиб, дипломни бекор қилдирди.

Таълим муассасасида ишловчилардан бири келишилган қиёфадошлар қўриқлаш хизмати ходимлари бўлган аудиторияда имтиҳон топширгани, ҳамма ушбу найрангдан бохабар бўлгани, аммо Нусрат мамлакатда жуда обрўли оила фарзанди бўлгани сабаб ушбу жиноятни яширишга уринилганлигини таъкидлади.