Қозоғистон давлат раҳбари Қосим-Жўмарт Тўқаев мамлакатнинг биринчи президенти Нурсултон Назарбоевнинг давлат бошқаруви органларида кадрлар сиёсати тизими бўйича ваколатларини кенгайтириш ҳақидаги фармонни имзолади. Бу ҳақда Regnum хабар бермоқда.
Фармонга кўра, Ташқи ишлар ҳамда Ички ишлар вазирларидан ташқари барча вазирликларнинг раҳбарлари Қозоғистон президенти томонидан номзодлар Назарбоев бошқараётган Хавфсизлик кенгаши билан келишилганидан кейин тайинланади.
Шунингдек, Қозоғистон президентига бўйсунувчи органларга тайинланадиган раҳбарларнинг номзодлари ҳам Хавфсизлик кенгаши билан келишувдан кейин лавозимга тайинланади.
Қозоғистоннинг биринчи президенти Нурсултон Назарбоев истеъфога чиққанини эълон қилганидан кейин пойтахт Остона шаҳри номи Нур-Султонга ўзгартирилган, Қорағанда, Чимкент, Павлодар, Уст-Камнегорск ва Петропавловскда Назарбоев номи билан аталган кўчалар пайдо бўлганди. Кейинчалик мамлакатнинг барча вилоятларида биттадан кўчага биринчи президент номини бериш таклиф қилинган.Истеъфодан кейин Назарбоев рассомлик фаолияти билан шуғулланаётгани, вақтини оиласи ва неваралари билан ўтказаётганлигини билдирган. У мой бўёқда табиат манзараларини тасвирламоқда ва унинг ижод намуналари кейинчалик Қозоғистондаги музейларга жойлаштирилиши мумкин. Собиқ президент дўстлари ва танишлари тавсиясига кўра 30 га яқин ишларни чизиб тугатганлигини билдирган.
Изоҳ (0)