Австралиянинг етакчи газеталари бош саҳифасидаги матнлари маркер билан бўялган ҳолда нашр этилди. Ушбу акция газеталар эркинлигини «бўғиб қўйган» миллий хавфсизлик тўғрисидаги Австралия қонунларига қарши қаратилган, деб ёзмоқда Meduza.
Ушбу норозилик акциясида мамлакатдаги 20 дан ортиқ нашр, телекомпания ва янгиликлар сайтлари, жумладан, Австралиянинг энг оммавий газеталари The Daily Telegraph, Herald Sun, The Advertiser ҳам иштирок этган. Нашрларнинг биринчи саҳифасидаги бўялган матн юқорисига киноя билан «махфий» тамғаси ҳам босилган.
Sydney Morning Herald газетаси бош муҳаррири Лиза Дэвис бу кампания журналистлар эркинлиги учун эмас, балки Австралияда демократия таъминланиши учун қилинаётганлигини маълум қилган.
Нашр журналистик суриштирув ўтказган муаллифлар ва уларга маълумот берганларни 2018 йилда Австралияда қабул қилинган жосусликка алоқадор қонунга кўра таъқиб қилинмасликларини талаб қилмоқда.
20 октябрь, якшанба куни Австралия ҳукумати Австралия радиоэшиттириш корпорацияси ва News Corp Australia компаниясида 2019 йил июнида суриштирув ўтказганлиги учун уч нафар журналистнинг суд қилинишини эълон қилган. Суриштирувлар асосида ABC’нинг ҳарбий жиноятларга алоқадор маълумотлари, яъни мамлакат ҳарбийларининг Афғонистондаги ҳаракатлари ҳақида ҳамда Австралия махсус хизматлари фуқароларни қай тарзда хуфиёна кузатиши тўғрисида (The Daily Telegraph газетасида чоп этилган) бўлган. Иккала мақола ҳам махфий маълумотлар асосида ёзилган.
Изоҳ (0)