Хосеп Гвардиола номзоди Каталония ҳукумати раҳбари лавозимига илгари сурилиши мумкин

«Барселона» жамоаси собиқ устози, ҳозирда «Манчестер Сити» клубига мураббийлик қилаётган каталониялик Хосеп Гвардиола Женералитатнинг (Каталония ҳукумати) келгуси раҳбари лавозимига «Биргаликда Каталония учун» ҳаракатидан номзод бўлиши мумкин. Бу ҳақда Испаниянинг «Конфиденсьяль» нашри Каталония демократик партиясидаги манбалар, шунингдек, Каталониянинг собиқ раҳбари Карлес Пучдемон атрофидагиларга таянган ҳолда маълум қилди, дея хабар беради «Интерфакс».

Испаниянинг яна бир нашри — «А-Бэ-Сэ» газетасининг қайд этишича, Каталонияни ҳозирги ҳукумат раҳбари, ўз партиясида нуфузини йўқотган Ким Торра ҳамда ундан аввалги Карлес Пучдемондан кўра ёмонроқ бошқарган номзодларни тасаввур қилиш қийин.

Испания ОАВлари шу сабабли Гвардиолага кўз тикиш «Биргаликда Каталония учун» ҳаракатига ютқизиқсиз, бироқ «Манчестер Сити» мураббийи учун эса бирмунча қалтис бўлиши мумкинлигини таъкидламоқда.

Шу билан бирга, ҳозирча на Гвардиола, на Каталония демократик партияси ва на «Манчестер Сити» бундай режаларни тасдиқлагани йўқ.