Эрон ядро мажбуриятларини қисқартиришнинг янги босқичига тайёргарлик кўрмоқда

Теҳрон ядро бўйича мажбуриятларини қисқартириш чора-тадбирларининг тўртинчи босқичига тайёрланаётгани ва Европа ўз зиммасидаги вазифаларни бажарса, ушбу босқичга ўтилмаслигини билдирди. Бу ҳақда Эрон ТИВ вакили Аббос Мусавий сўзларига таяниб «РИА Новости» хабар берди.

«Ядро бўйича мажбуриятларни қисқартиришнинг тўртични босқичи ишлаб чиқилди. Биз иш бу босқични фаоллаштиришимизгача етиб бормаслигига ва Европа томонининг ўз зиммасига олган вазифаларни амалга оширишига умид қиламиз», — дея таъкидлаган Мусавий.

2015 йилда олтилик, яъни Буюк Британия, Германия, Хитой, Россия, АҚШ ва Франция Эрон билан Ядро дастури бўйича биргаликдаги кенг қамровли ҳаракатлар режасини ишлаб чиқди. Келишувга кўра, Эронга қўлланилган санкциялар ядро дастурида чекловлар қўллаш эвазига олиб ташланиши кўзда тутилганди. Шартноманинг дастлабки кўриниши уч йил ҳам амал қилмади: 2018 йил май ойида АҚШ келишувдан чиқишини эълон қилди ва Эрон ислом республикасига нисбатан кескин санкциялар қўллади.Теҳрон эса АҚШ келишувдан чиққанидан бир йил ўтгач «стратегик сабр-тоқат»дан кейин жорий йилнинг 8 майида Ядро дастуридаги чекловларни тан олмай ҳаракат қилишни бошлади. Ядро дастури бўйича биргаликдаги кенг қамровли ҳаракатлар режасини бажармасликнинг биринчи босқичи уранни бойитиш ва оғир сув бўйича чекланган меъёрларни бузиш бўлди. Кейинчалик Эрон режага амал қилмасликнинг иккинчи босқичига ўтди, яъни уран мамлакат учун керакли миқдорда бойитилиши эълон қилинди. Учинчи босқич 6 сентябрда бошланди: Эрон режада ва ундаги низомларда белгиланган чегараларни четлаб ўтган ҳолда ядро тадқиқотлари бўйича ишларни амалга оширди.