Шуҳрат Ғаниевнинг гаплари халқнинг эътирозига сабаб бўлмоқда ва бу одамларнинг нотўғри йўлларга ҳаракатини уйғотиб қўйиши мумкин. Бу ҳақда сенатор Мақсуда Варисова 30 сентябрь, душанба куни бўлиб ўтган Олий Мажлис Сенатининг Регламент ва одоб комиссияси йиғилишида айтиб ўтди, дея хабар бермоқда «Дарё» мухбири Мусулмонбек Иброҳимов.
Одинроқ Фарғона вилояти ҳокими соқол, рўмол ва иш жойларида намозга қарши чиқиб, бунга бўйсунмаганларни қамаш билан таҳдид қилгани ёзилган аудио тарқалган эди. Шунингдек, Фарғона вилояти ҳокими селектор давомида турк инвесторининг соқолини олишни буюриб, кимлар депутат бўлишини очиқлаган, вилоятдаги иш жойларида намоз ўқишга шароит яратиладиган ҳолатлар аниқланса, ўша корхона раҳбарига жиноят иши очилишини маълум қилганди.
Олий Мажлис Сенатининг Регламент ва одоб комиссияси йиғилишида Фарғона вилояти ҳокими, сенатор Шуҳрат Ғаниевнинг ижтимоий тармоқларда тарқалган аудиоси — соқол, рўмол ва иш жойларида намозга қарши чиқиб, бунга бўйсунмаганларни қамаш билан таҳдид қилгани муҳокама қилинди.
Муҳокама чоғида Регламент ва одоб комиссияси аъзоси, сенатор Мақсуда Варисова Ўзбекистон ривожланаётган давлатлар қаторига кириб бораётган бир пайтда Фарғона вилояти ҳокимининг ўйламай айтган гаплари ишларни чиппакка чиқариб қўйиши мумкинлигини айтиб ўтди.
«Халқимизда бир яхши нақл бор: ўйнаб гапирсанг ҳам ўйлаб гапир. Вилоят ҳокими сўзи ҳар бир инсонга, оммага қандай таъсир қилишини раҳбар сифатида яхши билиши керак эди. Бу нарсани сенатор сифатида қоралайман. Яна бир хавотирли жойи ушбу ҳокимнинг гаплари халқимизнинг эътирозига сабаб бўлмоқда ва бу одамларнинг нотўғри йўлларга ҳаракатини уйғотиб қўйиши мумкин», — деди сенатор.
Регламент ва одоб комиссияси аъзосининг таъкидлашича, гап агар рўмол ҳақида кетадиган бўлса, рўмол кўп йиллар давомида аёллар кийимининг бир элементи бўлиб келган: «Ҳаммамиз, оналаримиз, аёлларимиз рўмолни ўзимизга хос равишда ҳамма жойда — кўча-кўйда, хоҳлаган жойда ўрамоқда. Бирор жойда тазйиққа учраган жойи йўқ. Мана шу рўмол баҳонасида шу даражада қаттиқ гапириш нотўғри бўлган», — деди у.
Мақсуда Варисова сенатор сифатида халқнинг ғазабини қўзғашга сабаб бўлган чиқиш учун Шуҳрат Ғаниевга нисбатан чора кўрилишини сўради.
Аввалроқ Фарғона вилояти ҳокимлиги матбуот хизмати Шуҳрат Ғаниевнинг тарқалган аудиоси бўйича расмий баёнот бериб, ҳокимнинг сўзлари нотўғри талқин қилинганлигини билдирган эди. Олий Мажлис Сенатининг Регламент ва одоб комиссияси йиғилишида ҳоким Ғаниев ижтимоий тармоқларда бўлаётган муҳокамалар тўғри бўлганини тан олди. Ҳокимни Сенат қаттиқ огоҳлантирди ва 3 ой синов муддат берди.
Изоҳ (0)