Марказий банк баъзи ОАВда импорт операцияларида валюталарни айирбошлаш бўйича чекловлар жорий этилгани ҳақида тарқалган хабарларга муносабат билдирди.
«Товарларни (хизматлар)ни доимий равишда олиб кирувчи тадбиркорлик субъектларига чет эл валюталарини сотиш операциялари барча тижорат банклари томонидан ҳеч қандай чекловларсиз штат режимида амалга оширилади», — дейилади МБ хабарида.
Қайд этилишича, 2017 йилнинг сентябрь ойидан эркин конвертация амалиёти жорий этилганидан бери чет эл валютасини сотиб олиш операциялари миқдори 2 баравар, валюта сотиш операциялари 3 бараварга ўсган. Шунингдек, валюта сотиб олаётган компаниялар сони ҳам 2 йил ичида 4100 тадан 7600 тагача кўпайган.
Иқтисодни эркинлаштириш ва очиқлаштириш билан бир вақтда бошқарувида давлат улуши бор хўжалик субъектларининг самарадорлигини ошириш ва маҳаллий ишлаб чиқарувчиларни қўллаб-қувватлаш борасида ҳам муайян қадамлар қўйилмоқда.
Аммо давлат харидларини амалга ошириш вақтида импорт қилинаётган маҳсулотларнинг маҳаллий аналоглари борлиги, корхона фаолиятига алоқадор бўлмаган маҳсулотларни олиб кириш ҳолатлари ҳамда маҳсулот нархи ошириб кўрсатиш ҳолатлари аниқланган ва бу ўз навбатида шу мақсадда ажратилган давлат маблағлари «музлатиб» қўйилишига олиб келаётгани таъкидланган.
Шу сабабли давлат харидлари, инвестиция ва бошқа дастурлар доирасида айрим давлат компанияларининг импорт контрактларини ишлаб чиқариш ва инвестиция лойиҳаларида акс эттирилган нархларнинг мослиги, шунингдек, ички бозорда сифати ва нархи ўхшаш товарларнинг мавжудлиги эътиборга олиниб, тегишли чоралар кўрилмоқда.
Ушбу чоралар, аввало, давлат корхоналари фаолиятини шаффоф қилишга, уларнинг рақобатбардошлигини оширишга ва керакли маҳсулотларни мамлакат ичида харид қилишга йўналтиришга қаратилган, — дейилади хабарда.
Шуниндек, Марказий банк дунёнинг кўплаб ривожланган мамлакатларида иқтисоднинг турли соҳаларининг самарадорлигини ошириш мақсадида шунга ўхшаш чекловлар киритилганинини ҳам қайд этган.
Изоҳ (0)