Shuhrat G‘aniyevning gaplari xalqning e’tiroziga sabab bo‘lmoqda va bu odamlarning noto‘g‘ri yo‘llarga harakatini uyg‘otib qo‘yishi mumkin. Bu haqda senator Maqsuda Varisova 30-sentabr, dushanba kuni bo‘lib o‘tgan Oliy Majlis Senatining Reglament va odob komissiyasi yig‘ilishida aytib o‘tdi, deya xabar bermoqda “Daryo” muxbiri Musulmonbek Ibrohimov.
Odinroq Farg‘ona viloyati hokimi soqol, ro‘mol va ish joylarida namozga qarshi chiqib, bunga bo‘ysunmaganlarni qamash bilan tahdid qilgani yozilgan audio tarqalgan edi. Shuningdek, Farg‘ona viloyati hokimi selektor davomida turk investorining soqolini olishni buyurib, kimlar deputat bo‘lishini ochiqlagan, viloyatdagi ish joylarida namoz o‘qishga sharoit yaratiladigan holatlar aniqlansa, o‘sha korxona rahbariga jinoyat ishi ochilishini ma’lum qilgandi.
Oliy Majlis Senatining Reglament va odob komissiyasi yig‘ilishida Farg‘ona viloyati hokimi, senator Shuhrat G‘aniyevning ijtimoiy tarmoqlarda tarqalgan audiosi — soqol, ro‘mol va ish joylarida namozga qarshi chiqib, bunga bo‘ysunmaganlarni qamash bilan tahdid qilgani muhokama qilindi.
Muhokama chog‘ida Reglament va odob komissiyasi a’zosi, senator Maqsuda Varisova O‘zbekiston rivojlanayotgan davlatlar qatoriga kirib borayotgan bir paytda Farg‘ona viloyati hokimining o‘ylamay aytgan gaplari ishlarni chippakka chiqarib qo‘yishi mumkinligini aytib o‘tdi.
“Xalqimizda bir yaxshi naql bor: o‘ynab gapirsang ham o‘ylab gapir. Viloyat hokimi so‘zi har bir insonga, ommaga qanday ta’sir qilishini rahbar sifatida yaxshi bilishi kerak edi. Bu narsani senator sifatida qoralayman. Yana bir xavotirli joyi ushbu hokimning gaplari xalqimizning e’tiroziga sabab bo‘lmoqda va bu odamlarning noto‘g‘ri yo‘llarga harakatini uyg‘otib qo‘yishi mumkin”, — dedi senator.
Reglament va odob komissiyasi a’zosining ta’kidlashicha, gap agar ro‘mol haqida ketadigan bo‘lsa, ro‘mol ko‘p yillar davomida ayollar kiyimining bir elementi bo‘lib kelgan: “Hammamiz, onalarimiz, ayollarimiz ro‘molni o‘zimizga xos ravishda hamma joyda — ko‘cha-ko‘yda, xohlagan joyda o‘ramoqda. Biror joyda tazyiqqa uchragan joyi yo‘q. Mana shu ro‘mol bahonasida shu darajada qattiq gapirish noto‘g‘ri bo‘lgan”, — dedi u.
Maqsuda Varisova senator sifatida xalqning g‘azabini qo‘zg‘ashga sabab bo‘lgan chiqish uchun Shuhrat G‘aniyevga nisbatan chora ko‘rilishini so‘radi.
Avvalroq Farg‘ona viloyati hokimligi matbuot xizmati Shuhrat G‘aniyevning tarqalgan audiosi bo‘yicha rasmiy bayonot berib, hokimning so‘zlari noto‘g‘ri talqin qilinganligini bildirgan edi. Oliy Majlis Senatining Reglament va odob komissiyasi yig‘ilishida hokim G‘aniyev ijtimoiy tarmoqlarda bo‘layotgan muhokamalar to‘g‘ri bo‘lganini tan oldi. Hokimni Senat qattiq ogohlantirdi va 3 oy sinov muddat berdi.
Izoh (0)