Ўзбекистон мусулмонлари идораси ижтимоий тармоқларда тарқалган «баъзи масжидлар ёпилар экан, айрим имомлар ишдан бўшар экан», деган гап-сўзларга муносабат билдирди.
Сўнгги йилларда Ўзбекистонда 24 та янги масжид очилди. Улар қаторида намозхонларга туҳфа этилган Қорақалпоғистондаги «Имом Эшон Муҳаммад», Тошкент шаҳридаги «Сузук ота», «Имом ат-Термизий», «Шайх Муҳаммад Содиқ Муҳаммад Юсуф», Сурхондарё вилоятидаги «Ҳаким Термизий», Хоразм вилоятидаги «Охун бобо» ва Фарғона вилоятидаги «Чилигижийда» каби масжидларни алоҳида кўрсатиш мумкин.
«Шунингдек, республикада 106 та масжид тўлиқ янгидан қурилди, 231 та масжид капитал таъмирдан чиқарилди. Бундай улуғвор ишлар Ўзбекистонда шиддат билан давом этмоқда.
Яна бир жиҳат, аслида масжидларни ёпиш масаласи қандайдир мансабдор шахснинг ваколатига кирмайди, балки Вазирлар Маҳкамасининг 2018 йил 31 майдаги 409-сон қарори асосида ижро қилинади.
Шунингдек, масжид имом-хатибини ишга тайинлаш ва лавозимидан озод этиш масаласи ҳам Ўзбекистон мусулмонлари идораси томонидан амалга оширилади.
Демак, ҳуқуқий тамойилларни инкор этиш, Ўзбекистон аҳолисининг ҳақ-ҳуқуқлари, диний қадриятлари ва эҳтиёжларига ҳурматсизлик кўрсатишга ҳеч кимнинг ҳақи йўқ.
Ўзбекистон мусулмонлари идораси ислом шиорлари, имом-домлалар ва масжидларга нисбатан билдирилган ҳар қандай номақбул фикрларга нисбатан доимо муросасиздир», — дейилади хабарда.
Изоҳ (0)