Markaziy bank valyutalarni ayirboshlash bo‘yicha cheklovlar joriy etilishi haqidagi xabarlarga munosabat bildirdi

Markaziy bank ba’zi OAVda import operatsiyalarida valyutalarni ayirboshlash bo‘yicha cheklovlar joriy etilgani haqida tarqalgan xabarlarga munosabat bildirdi.

“Tovarlarni (xizmatlar)ni doimiy ravishda olib kiruvchi tadbirkorlik subyektlariga chet el valyutalarini sotish operatsiyalari barcha tijorat banklari tomonidan hech qanday cheklovlarsiz shtat rejimida amalga oshiriladi”, — deyiladi MB xabarida.

Qayd etilishicha, 2017-yilning sentabr oyidan erkin konvertatsiya amaliyoti joriy etilganidan beri chet el valyutasini sotib olish operatsiyalari miqdori 2 baravar, valyuta sotish operatsiyalari 3 baravarga o‘sgan. Shuningdek, valyuta sotib olayotgan kompaniyalar soni ham 2 yil ichida 4100 tadan 7600 tagacha ko‘paygan.

Iqtisodni erkinlashtirish va ochiqlashtirish bilan bir vaqtda boshqaruvida davlat ulushi bor xo‘jalik subyektlarining samaradorligini oshirish va mahalliy ishlab chiqaruvchilarni qo‘llab-quvvatlash borasida ham muayyan qadamlar qo‘yilmoqda.

Ammo davlat xaridlarini amalga oshirish vaqtida import qilinayotgan mahsulotlarning mahalliy analoglari borligi, korxona faoliyatiga aloqador bo‘lmagan mahsulotlarni olib kirish holatlari hamda mahsulot narxi oshirib ko‘rsatish holatlari aniqlangan va bu o‘z navbatida shu maqsadda ajratilgan davlat mablag‘lari “muzlatib” qo‘yilishiga olib kelayotgani ta’kidlangan.

Shu sababli davlat xaridlari, investitsiya va boshqa dasturlar doirasida ayrim davlat kompaniyalarining import kontraktlarini ishlab chiqarish va investitsiya loyihalarida aks ettirilgan narxlarning mosligi, shuningdek, ichki bozorda sifati va narxi o‘xshash tovarlarning mavjudligi e’tiborga olinib, tegishli choralar ko‘rilmoqda.

Ushbu choralar, avvalo, davlat korxonalari faoliyatini shaffof qilishga, ularning raqobatbardoshligini oshirishga va kerakli mahsulotlarni mamlakat ichida xarid qilishga yo‘naltirishga qaratilgan, — deyiladi xabarda.

Shunindek, Markaziy bank dunyoning ko‘plab rivojlangan mamlakatlarida iqtisodning turli sohalarining samaradorligini oshirish maqsadida shunga o‘xshash cheklovlar kiritilganinini ham qayd etgan.